AD34 2E 39/369 Maître Philippe BRUN Lodève
Le 10 juin 1599 Contrat de Mariage entre
Pierre JEHAN et Lucie CROZETTE du Therondel Fozières (34)
Sosas n° 6070 et 6071 G 13
Mariatge de Pierre JEHAN del Therondel et Lucie CROZETTE
Au nom de nre seigneur dieu (soict) faict amen l'an mil cinq cents quatre vingts dix neuf et le dixiesme jour du moys de juing avant midy regnant le prince que dessus en la citté de Lodeve pardevant moy notaire royal soubzné et pñs les tesmoings soubz escripts comme a la louange de Dieu et accroissemant de lumaing liniatge mariatge ayt esté traité par parolle du passé et se solempnizera en face de notre maire saincte esglise catholique apostolicque romene par et (entre) Pierre JEHAN fils a feu autre Pierre JEHAN du Mas de Terondel terre et juridiction de Fozieres dioceze dud Lodeve dune part et honneste filhe Lucie CROZETTE fille legitime et naturelle a feus Jehan CROZET que de Guillaumette CAZELLE en leur vivant mariés habitans du Mas de l'Abeilh terre de Lauroux dicte dioceze daultre part
Et pour ce quil est de bonne et antiene costume de tous tamps observée que mariatge ne se faict sans constituõn de douaire lequel vient du costé des fames pour plus facillement supporter les charges de mariatge causant qui sont grandes a ceste cause constitué en personne Bringou CROZET fils aud feu Jehan CROZET et frere a lad Lucie lequel ayant led mariatge pour agreable et icelluy ayant procuré de son bon gré et par teneur du pñt instrumant a jamais valable et yrrevocable a donné constitué et assigné en douaire et verquiere a lad Lucie sad seur une avec led Pierre JEHAN son futeur expoux y pñts et pour eulx et les leurs a ladvenir estipulans la somme de vingt troys escus ung tiers vallant septante livres ts payables scavoir le jour de la solempnisaõn dud mariatge dix escus et le reste restante deux livres chacun an comansant la premiere paye ung an apres la solempnisaõn dud mariatge et ainsy chacun (an) continuant lesquelles payes jusques a ce que lad somme de septante livres ts soict entieremant payée et sans acomulaõn de payes sy non quil appareut de dilligances sufficiantes faites par lesd mariés avec les pactes suyvans cest que lad Lucie CROZETTE moyennant led douaire sera tenue quitter aud Bringou CROZET sond frere touts autres droicts et biens paternels maternels et fraternels, Item que led Pierre JEHAN sera tenu recognestre led douaire a lad Lucie CROZETTE sad futeure expouse en et sur touts et chacuns ses biens pñs et advenir pour le tout luy randre et restituer advenant cas de restituõn ce que dieu par sa saincte grace ne vueilhe permettre comme se trouvera avoir esté receu Item plus est de pacte que lesd futeurs mariés se donnent respectivemant lung a laultre scavoir led Pierre JEHAN venant a predesseder delaissant survivante lad CROZETTE sa futeure expouse la somme de dix livres ts et lad CROZETTE venant samblable cas a donné comme de pñt donne aud Pierre JEHAN son feutur expoux la somme de cinq livres ts payables dans ung an apres led cas adveneu
Lesquels pactes et tout le contenu au presant contract lesd parties respectivemant en ont obligés et ypotequés touts et chacuns leurs biens pñs et advenir quils ont sobmis aux rigueurs des cours et scaulx procedant (...) de parties et a une chacune dicelles en seul renonceant a tout droict par lequel pourroient venir au contraire et ainsy lont promis et juré aulx saincts evangiles de dieu.
Faict et recité aud Lodeve maison de Sire Guillaume VIVAREILH merchant pñt a ce led VIVAREILH Thomas BROLLIET Mre Anthoine JAUDON pbre et vicaire de Soumont et Anthoine ESPINASSE des Molieyres et moy Philippe BRUN notaire dud Lodeve soubzné avec lesd JAUDON et VIVAREILH les autres requis et parties ont dict ne scavoir escripre.
A E (Anthoine ESPINASSE), JAUDON, VIVAREL, Ainsy receu BRUN notaire
Quictance paternelle pour Bringou CROZET de L'Abeilh
L'an mil cinq cens quatre vingts dix neuf et le dixiesme jour du moys de juing apres midy regnant (le prince) que dessus a Lodeve sest personnellemant establie Lucie CROZETTE filhe legitime et naturelle a feu Jehan CROZET du Mas de Labeilh terre de Lauroux dioceze dud Lodeve et fame de Pierre JEHAN du Mas de Terondel terre de Lauroux (Fozières!) dioceze dud Lodeve laquelle sachant que moyenant la somme de septante livres ts ce jour constituée en doct et verquiere par Bringou CROZET son frere dud mas de Labeilh elle avoit esté et est bien demeuroist adottée des biens de sond feu paire maire freres et seur ayant esguard aulx charges que sont a presant auxd biens a ceste cause lad Lucie CROZETTE laquelle du bon voulloir et consantement dud Pierre JEHAN sond mary et les linceuls maritelle (lict dotal) quant a ce fasse luy donnant a quicté cedé remis et relaxé comme de pñt quicte cede remet et relaxe aud Bringou CROZET sond frere y pñt et pour luy et les siens a ladvenir estipulant touts autres droicts et biens paternels maternels et fraternels leguats testamentaires legitime et supplemans dicelle que autres quelconques saulf led douaire et futeure succession et pour tout ce dessus tenir garder observer et ny contrevenir lesd parties de ce que une chacune concerne en ont obligés et ypotecqués touts et chacuns leurs biens pñs et advenir quils ont sobmis aulx rigueurs des cours et scaulx procedans et a une chacune dicelles en seul renonceant a tout droict par lequel pourroient venir au contraire et ainsy lont promis et juré aulx saincts evangiles de nre seigneur dieu
Faict et recité
aud Lodeve maison de Sire Guillaume VIVAREILH
merchant pñt a ce led VIVARELH, JAUDON, AE (Anthoine ESPINASSE), Ainsy receu BRUN not royal
Note: le même jour Bringou CROZET (frère de Lucie CROZET) a épousé Peyronne JEHAN (soeur de Pierre JEHAN) et la dot s'est élevée aussy à 70 livres ts payables aux mêmes conditions. AD 34, M° BRUN Philippe, 2E 39/369.