AD 42 5E 44_30 Me PAUCHE St Héand (42)
18 avril 1659 Testament de Antoine MOULARD ainé 7488 G 13 Expedié aud Anthoine MOLARD le jeune
Au nom de dieu, ainsi soit il, a tous ceulx qui ces pñtes verront, nous Senechal en la Senechaucée de St Estienne de Furans transferée a Montbrison scavoir faisons que pardevant le nõre royal soubzné et en la pñce des tesmoings appres nommés sest establi hõn Anthoine MOLLARD laisné , habitant de Sallectes parroisse de St Heand, lequel de son gré, estant sain de ses sans parolles memoire et entendement comme est apparu ausd nõre et tesmoings par ses parolles et discours faicts sur ce qui est de sa disposiõn testamentaire toutesfois indisposé de sa personne, faisant consideration que la mort est assurée a tous et toutesfois incertain de lheure d'icelle, desirant la prevenir, a par cesd pñtes faict son testamentaire nuncupatif en la forme et maniere qu'ensuyt revocquant tous autres
Et premier a faict sur sa personne le signe de la Ste Croix, disant In nomine patris et filii et spiritus sancti, amen a recommandé son ame a Dieu le supplie lui faire pardon de tous ses pechés, prie la Ste Vierge et tous les Sts et Stes de paradis lui estre favorables par leurs prieres et supplications envers Dieu affin quil puisse obtenir led pardon, veult que quand son ame sera separée de son corps il soit faict ung service divin dans lesglize de St Heand par Mrs les curés pbres et desservants de lad parroisse a son intention et des fidelles trespassés ce faict veult son corps estre enterré au cymetiere de lad esglize, vas et tombeau de ses parens et quant a ses autres aulmosnes et bien faicts il sen remect a la volonté et discretion de Catherine JACQUEMO sa belle fille co..? (veuve) de Pierre MOLLARD et de Anthoine MOLLARD le jeune son fils sen fiant a eulx
Item donne et legue a Michel et Jean MOLLARD enfans legitimes dud feu Pierre MOLARD et de lad Catherine JACQUEMO a chacun deulx la somme de dix livres tz a payer quand chacun deulx aura atteint laage parfaict de vingt cinq ans et jusques a ce ne põrront demander interests et ce pour tous droicts quils peulvent avoir au bien dud qui teste qui est leur ayeul paternel
Item donne et legue aussi a Anne, Jullienne, Catherine et Anthoinette MOLLARD aussi ses petittes filles a chacune delles la somme quinze livres põr ladmitié que led testateur leur porte a payer quant elles auront atteint chacune delles vingt cinq ans et põr tous droicts qu'elles põroient avoir auxd biens dud qui teste
Donne et legue de plus a tous ses autres parens pretendant droicts en ses biens cinq sols a payer faisant apparoir de leurs droicts voulant tous les sud legats estre payés aux susd legataires par son heritier universel appres nommé
Au residu de tous ses autres biens en quoi que consistent led testateur a nommé et dicté de sa propre bouche põr heritier universel en iceulx led Anthoine MOLLARD le jeune aussi son petit fils põr estre enfant dud Pierre MOLARD et de lad Catherine JACQUEMO et d'aultant que led feu Pierre MOLLARD par son testament en date du vingtiesme jour de juing 1653 receu par led nõre a donné pouvoir aud testateur son pere de nommer põr heritier en ses biens generallement tel de ses enfans masles quil lui plairoit en quitte de quoy il eslict et nomme led Anthoine MOLARD le jeune põr heritier universel en ses biens aux charges contenues par le legat dud Pierre MOLLARD voulant que lad nomination ait effect
Ainsi la voullu dicté et ordonné led Anthoine MOLLARD laisné auquel a esté leu et releu le pñt sond testament de mot a autre qui a dict et declaré estre sa volonté et intention quil veult valloir par fondement de testament nuncupatif solempnel, codicille donnation a cause de mort et par touttes autres formes quil põrroit et debra valloir priant et requerant les tesmoings ci appres nommés estre souvenants de sa volonté intention et en porter tesmoignage de verité en tous lieux et led nõre den faire expedition a quil appartiendra
Faict aud lieu de Salectes parroisse susd maison dud Pierre MOLARD dans la chambre appellée cuysine avant midy le dix huictiesme jõr d'april mil six cens cinquante neuf en pñce [Renvoi: Sr Estienne BLONDET (?) dud Malleval] Jean PELLEGRIN le jeune Jean GRANGE Jean MEYER tisserand Anthoine JACQUEMO fournier, François PERRICHON tisserand du lieu de Marco et Pierre PERRICHON aussi tisserand tous habitans de la parroisse dud St Heand tesmoings requis ont signés lesd BLONDET et François PERRICHON ny led testateur et le surplus des tesmoings põr ne scavoir ...
E. BLONDET, PERRICHON, PAUCHE nõre royal