AD34 2E 40/124 M°MARTIN Lodève, le 11 Juillet 1682
Testament d'Antoine SALVAGNAC Vieux (n° 2768 G12) de Briandes (Lunas 34)
L'an mil six cens quatre vingts deux et le onziesme jour du mois de jullet dans Lodeve apres midy reignant tres chrin prince Louis par la grace de Dieu Roy de France et de Navarre par devant moy nõre et tesmoingts bas nommés
a esté personnellement constitué Me Antoine SAUVAGNAC Vieux fils dautre habitant du mazaige de Briandes juridiction de Lunas deoceze de Beziers
Briandes avait pour église paroissiale Notre Dame de Nize, dans une combe à proximité d'une source réputée propice aux maladies des yeux.
lequel se voyant advancé dans laage aprehandant destre surpris de la mort estant touttesfois en ses bons sens memoire et entendement et parfaiitte cognoissance de son gred a voullu faire et ordonner son dernier testemt nuncupatif et disposer de ses biens en la forme et maniere que sensuit
En premier lieu a faict le signe de la croix sur sa personne disant in nomine patris et filiis spriritus sancti amen et apres avoir recommandé son ame a dieu et a la glorieuse vierge marie a voullu et ordonné led testateur que son corps soit anseveli au cimetiere de lesglize St Pierre de Transilliac (Lunas) leur ancienne paroisse laissant ses honneurs funebres a la discreption de son herettier bas nommé
En second lieu venant a la disposition de ses biens led testateur a confirmé la donnaõn patrimoinialle quil a faict en faveur de Me Antoine SAUVAGNAC pr(ê)tre a prñt chappellain dans le dioceze de Carcassonne et veut que moyennant ce il soit contant et satisfaict
En troisiesme lieu a pareillemant confirmé les constitutions quil a faicttes a Catherine SAUVAGNAGUE sa fille veuve de Claude COURVESY (?) en faveur de mariage et a feue Margueritte SAUVAGNAGUE mariée avec Estienne AFFRE de Gours et veust que lad Catherine et les enfants de lad Margueritte moienant cinq sols quil leur donne ancore soint contans et satisfaicts et ne puissent prethandre autre chose sur ses biens ny sur ceux de Marguerite PASCALLE sa femme duquel led testateur est héritier
En quatriesme lieu a donné et légué led testateur a Pierre SAUVAGNAC (,) Joseph SAUVAGNAC et Marc Antoine SAUVAGNAC ses trois enfans la somme de dix livres a chascun pour tout droit de legitime quils peuvent prethandre sur ses biens par (...) paye(men)t un an apres le deces dud testateur
Finallement a donné et legué a tous autres parens en quel degred que puissent estre la somme de cinq sols entre eux a diviser et moienant ce leur impose scilance perpetuelle
Et en tous et chescungs ses autres biens presants et advenir ou que soint assis et scitués led testateur a faict et institué son herittier unversel et general et de sa propre bouche la nommé scavoir est Jean SAUVAGNAC son fils ayné auquel il remet aussy apres sond deces lherittaige de lad feue PASCALLE sa femme pour le tout en faire a ses plaisirs et volontés tant en la vie que en la mort sans aucune substituõn voulant neantmoing quil ne puisse rien faire au frait desd herittaiges sans ladvis et con(se)il dud Me Antoine SAUVAGNAC pretre son fils
Et cest son dernier testemt que veust que vaille comme testemt codicille donnaõn a cauze de mort peust valloir cassant revoquant tous autres(,) le prñt demeurant en sa force et valleur(,) duquel a prié les tesmoins bas nommés en estre memoratifs et moy nõre luy en retenir acte concedé
Faict et recitté a la maison de moyd nõre presens Me Michel (...) procureur juridictionnel dud Lodeve, Me Guillaume JEAN mard manufacturier, Jean GOUDIN hui(ss)ier de lad ville et Paul SEVERAC (prêtre) beneficiaire dud Lodeve Me Michel GUARRIGUES cardeur de la ville de Clermont et Me Jean SUFFRE prêtre beneficiaire de lad ville Me Pierre CAMBACEDES cardeur aussi soubsné avec led testateur et moy Michel MARTIN nõre royal soubsné
SALVANIHAC, SUFFRE, M ASTRUC, SEVERAC, JEAN, GARRIGUES, GOUDIN, P CAMBACEDES, MARTIN nõre royal