AD 34, 2E 39/491 M° Guillaume BRUN Notaire de Lodève
2 août 1631 à Olmet (34)
1° testament de Barthélémy DARDE 3020 G 12
Testement de Barthelemy DARDE d'Olmet
Lan mil six cens trente ung et le second jour du moys d'aoust apres midy regnant le prince que dessus au lieu d'Olmet dioceze de Lodeve pardevant moy nõre royal et pñs les tesmoings soubz escripts, a esté personnellement estably Barthelemy DARDE laboreur habitant dud lieu lequel estant malade dans son lyt dettenu de maladie corporelle de laquelle doubte mourir quoy nonobstant sain de ses sens memoire et entendement par la grace de dieu considerant la vye de ce monde qui est miserable et quil ny a choze plus certaine que la mort ny plus incertaine que lheure dicelle desirant pourvoir au salut de son ame dispozer et ordonner des biens que dieu luy a donnés en ce monde affin quapres son deces narrive proces ny desbat entre ses heritiers et successeurs de son gred tout dol et fraulde cessant a faict et ordonné son dernier testement nouncupatif et derniere disposiõn de ses biens comme sensuyt.
En premier lieu a recomandé son ame a dieu le pere tout puissant a Jesus Christ son fils et au sainct esprit les priant de luy faire misericorde des offences quil a comis en ce monde et comettra jusques a lheure de son trespas implorant a ses fins les suffraiges de la glorieuse vierge Marie et de touts les saincts de paradis, renonçant a lennemy de nature et a toute sa puissance en faizant le signe de la saincte croix sur sa personne disant in nomine patris et filii et spiritu sancti amen et a voulu et ordonné icelluy testateur apres que dieu laura appellé de ce monde en lautre et que son ame sera sepparée de son corps quicelluy soict enterré au simitiere dud lieu et thombeau de ses predecesseurs, remettant lhonneur de ses funerailhes a la discretion de Catherine CALVINE sa femme.
Item a aussy voulu et ordonné led testateur que lad CALVINE sa femme soict maistraisse seignieuresse et ususfructuairix de touts et chacuns ses biens sans rendre compte ny prester le reliqua a condiõn dentretenir ses enfans honnestement suyvant sa qualitté et facultté de sesd biens vivant icelle en viduitté et non autrement et cest pour recompense des agreables services que luy a rendus et espere que continuera et moyenent ce la faicte son heritiere particuliere.
Item a legué et donné par droict dinstituõn et hereditaire portion et pour touts droicts et actions que Alaissette DARDELLE et Margueritte DARDELLE plus jeune ses filhes legitimes et naturelles et de lad CALVINE sa femme [Renvoi: pourroient avoir et prethendre en sesd biens] a chacune la somme de quarante cinq livres ts et deux robes lune drap de maiõn et lautre de cadis de colleur duement assorties payable scavoir la moytié de lad somme et robe de cadis au jour de leurs nopces et le restant dans ung an apres ou bien apres avoir atteint leaige competant de la pouvoir recepvoir et en deux payes comme dessus et moyenent ce veult que soient comptentes les faizant ses heritieres particulieres. Plus a legué et donné a touts ses parens et liniagiers qui pourront prethendre en ses biens cinq sols ts payables par une foys apres son deces entre eulx a diviser et moyenent ce les a aussy faicts ses heritiers particuliers.
En touts et chacuns ses autres biens noms droicts voix et actions meubles immeubles pñs et advenir où que soient et puissent estre assis et scittués aud testateur appartenents, son heritiere universelle et generalle a faicte et institué led Barthelemy DARDE testateur et la nommée de sa propre bouche scavoir est autre Margueritte DARDELLE aynée sa filhe legitime et naturelle et de lad CALVINE pour de lad heredicté jouir uzer faire et dispozer a ses plaisirs et vollonté tant a la mort qua la vye par laquelle veult que soict satisfaict aulx leguats que dessus et autres debtes quaparestront estre legitimement deubs, cassant et revocquant touts autres tesmens codicilles donnaõns ou autre derniere disposiõn faicts a cauze de mort son pñt testement demeurant vallable en la meilheure forme que testement peult valloir de droict ayant prié les tesmoings soubz escripts par luy duement recoigneus estre memoratifs du contenu en sond testement pour luy en porter tesmogniaige de veritté et a moy nõre luy en faire et rettenir acte a ma notte et icelle expedier a sad heritiere et leguataire (ce que luy ay) concedé.
Faict et recitté dans la maiõn dud testateur pñs a ce Mrs Hugues LEDENAR marchant et François PUECH advocat en cour ordinaire dud Lodeve, Hugues MENARD chappelier habitant dud Lodeve, Barthelemy ROQUE, Estienne GAUFFRE, Guillaume GAUFFRE habitans dud lieu et Estienne PEYRE du lieu de Canals demeurent pour berger aud Olmet et moy Guillaume BRUN nõre royal dud Lodeve soubzné avec lesd LEDENAR et PUECH, led MENARD marqué a deux lettres, led testateur et autres tesmoings ont dict ne scavoir escripre.
LEDENARD, PUECH pñt, HM Menard, BRUN nõre