AD81 6E 22/148 M° CROZAS, Réalmont, Tarn

17 Janvier 1666 Contrat de mariage entre

Jean BATIGNE et Marie RODIERE (n°512 et 513 G10)

Au nom de dieu soict faict scachent tous pñts et advenir que lan de grace mil six cens soixante six, le dimanche dix septiesme jour de janvier environ midy, au masage de Rousade consulat de St Lieux dioceze d'Alby Sen(échauss)ée de Car(casson)ne regnant tres chretien prince Louis par la grace de dieu Roy de France et de Navarre, pardevant moy nõre royal de la ville de Realmont soubsné et pñts les tesmoins bas nommés,
ont esté faicts et arrestés pactes et conventions de mariage d'entre Jean BATIGNE fils de Gabriel BATIGNE laboureur du lieu de Bresquière paroisse de St Jean de Vals, d'une part, et Marie RODIERE fille d'Anthoine RODIERE laboureur dud masage de Rouzade d'autre, soict les pactes et condiõns suivans
En premier lieu led BATIGNE de l'advis et expres consantement de Guillaume BATIGNE son frere, Ramesy PUECH son beau frere, Jean CASALENC aussy son beau frere, André BLATGER aussy son beau frere, le Sr Anthoine BAULES M° Celier de la ville de Castres son cousin, et autres ses parants et amis icy pñts, a promis et promet de prendre pour sa femme et loyalle espouse lad Marie RODIERE, apres que les formalités requises seront observées en la forme de l'eglise catholique appostolique romaine et semblablement lad Marie RODIERE de l'advis et expres consentement dudict Anthoine RODIERE son pere, de Jacques RODIERE son cousin, et autres ses parans et amis icy presens a promis de prendre pour son mary et loyal espoux, led Jean BATIGNE apres que les annonces auront esté publiées en la forme susd
et pour suportaõn des charges dud futeur mariage et comme ayant icelluy pour agreable, ont esté constitués en leurs personnes led Anthoine RODIERE et Marguerite BERNADOUNE pere et mere de lad future espouse, lesquels ont donné et constitué en dot et verquiere a leur fille la somme de deux cens quarante livres ts de vingt souls presle (?), ung cohette et coissin remply de plumes du poix en tout de quatre vingts livres, quatre linseuls toille comune de maison, une couverte laine de valleur de dix livres, ung coffre fermé a clef [renvoi: et deux robes de cadis, lune noire et lautre grise agenscés suivant sa qualité] et oustre ce lad future espouze a constitué et apporté a sond espoux, huict bestes a laine scavoir, trois doubleues (?) qu'elle a en la maison de sond pere, et cinq brebis chez PELISSIER de Roumegoux, de laquelle constituõn lad Marguerite BERNADOUNE constitué de son chef la somme de vingt livres ts, led RODIERE le surplus, payable lad et entiere constituõn scavoir le jour des nopces, la somme de quarante livres, la susd cohette, coissin couverte caisse linseuls et une robe, et les susd brebis, et la somme de cens livres et lautre robe dans deux ans apres la consommaõn dud mariage et les autres cens livres restans, ung an apres, sans interests pendant le susd temps, lesquelles susd sommes, cohette, linseuls couverte et autres choses constitués venant led futeur espoux a recevoir, il sera tenu de les recognoitre a lad future espouse sur tous et chascuns ses biens pñts et advenir, avec le droit d'augment de lad constituõn suivant la coustume du pñt pais d'Albigeois pour en cas de predeces jouir dud adot et augment
et pour la bonne affection que led futur espoux porte a sad future espouse, il luy a donné et donne par donnaõn pure et simple toutes les robes bagues et joyaux dont elle se trouvera saisie le jour de son deces pour en faire et disposer a ses plaisirs et volontés en la vie et en la mort, et a cest effaict et pour lobservaõn de tout ce dessus lesd parties chacune comme les conserne ont obligé leurs biens pñts et advenir qu'ont soubsmis aux rigueurset Scels de Car(casson)ne, Beziers, Viguerie d'Alby, ordinaires des parties sur toutes renonciaõns necess(ai)res, ainsy lont promis et juré en presance des susd et de Jean ASTRE laboureur de Roumegoux, François GUISTES (?) de la Roudelie, Salvy ENJALBERT de St Anthonin, Pierre ARMENGAU et François ENJALBERT fils dud Salvy sestant ceux qui scavent signer soubsnés avec Guillaume CASALENC et de moy

A BAULLES,   J PUECH,   CAZALEN,   ARMENGAUD,   ENJALBERT,   CROZAS Nõre