CM CAUVY

AD34 2E 39/365 Maître Philippe BRUN Notaire de Lodève

10 juillet 1594 Contrat de mariage entre

Fulcrand CALVIN et Marguerite PELEN 6042 & 6043 G 13

Mariatge de Fulcrand CALVIN et Marguerite PELENE filhe de Arnaud PELEN du Mas de Roujon

Au nom de dieu soict faict amen lan mil cinq cens quatre vingts quatorze et le dixiesme jour du moys de juilhet apres midy regnant tres crestien prince Henry par la grace de dieu roy de France et de Navarre au villatge dOlmet dioceze de Lodeve pardevant moy nõre royal soubzné et pñts les tesmoings soubs escripts

Comme a la louange de dieu et accomplissemant de lhumain linatge mariatge ayt esté tracté et le jour pñt en la face de saincte maire esglize catholicque solempnizé comme antre les bons crestiens catholiques est acostumé par et antre Fulcrand CALVIN fils a feu Jehan CALVIN dud villatge d Olmet dune part et honneste filhe Marguerite PELENE filhe legitime et naturelle de Arnaud PELEN du masatge de Roujon terre et juridiõn de Lieuran de Cabrieres en le dioceze de Beziers daultre part

Et parce quil est de bonne et antienne costume de constituer douaire aulx hommes lequel vient du costé des femes pour ayder a susporter les charges de mariatge consant que sont grands a ceste cause constitué en personne le susd Arnaud PELEN paire a lad Marguerite lequel ayant led mariatge pour agreable et icelluy avoir procuré de son bon gre et par teneur du pñt instrumant a jamais vallable et yrrevocable a donné constitué et assigné en douaire et verquiere a lad Marguerite PELENE sad filhe une avec led Fulcrand CALVIN son mary y pñt et pour eulx et les leurs a ladvenir estipulans et acceptans la somme de quarante escus or sols vallant vingt livres ts Item pour les robes nuptialles (le mot deux est barré) troys robes scavoir une drap viollet et laultre deux drap de maison faictes et garnies comme se (...) et pour le lict nuptial une couverte laine et deux linseuls neufs le tout bon et sufficiant et une petite caysse femée a clef, payable de pñt et comptant pour le premier pa. (paie ?) dict de lavance la somme de quatre vingts livres ts illec reallement payée en piesses de dix souls doutzains et autre bonne monoye blanche (1) nombrée comptée et par led (luchaire ?) amborcée, pñt moy dict nõre et tesmoings soubs escripts, ensamble la robe nuptialle couverte linseuls et caysse et les deux robes restantes drap de maison payable de jour en jour a la vollonté desd mariés et les quarante livres ts restantes payables dans huict ans et huict payes quest pour chacune paye cinq livres ts payables chacun an dhuy datté du pñt en ung an complet et ainsy continuant lesd chacunes payes jusques a ce que lad somme de quarante escus soict antierement payée et satisfaict et ce sans acomulaõn de payes sinon quil apparoist de dillig(e)ances sufficentes faictes par lesd mariés ou lun des leurs

Et avec les pactes suyvans, cest que moyenant led douaire lad Marguerite PELENE sera tenue quicter ceder remetre et relauxer aud Arnaud PELEN sond paire touts autres droicts et biens paternels maternels et fraternels Item que led Fulcrand CALVIN mary de lad PELEN ensamble Jehan CALVIN frere aud Fulcrand CALVIN touts deux heritiers et desmerant en commung seront tenus recognoistre led douaire a lad Marguerite PELEN fame aud Fulcrand en et sur touts en chuns leurs biens pñts et advenir et icelluy randre, advenant cas de restituõn ce que dieu par sa saincte grace ne vuelhe permetre scavoir, lesd quatre vingts livres ts dans quatre ans et en quatre payes quest pour chacune paye vingt livres ts et le reste restant comme se trouvera avoir esté receu les robes couverte linseuls et caisse comme seront au tamps de lad restituõn Item est de pacte que au cas led Fulcrand CALVIN viendroict a desseder laissant survivante lad Marguerite PELEN sad fame et quelle convolleroict en secondes nuptces aud cas luy a donné et donne la somme de quinze livres ts payables dans lan apres son desseds et au cas contraire que lad PELEN sad fame viendroict a desseder laissant survivant led CALVIN sond mary aud cas luy a donné la somme de sept livres dix souls ts ausquels pactes et tout le conteneu en iceulx , parties respectivemant chacune en leur androict ont promis de tenir guarder et observer de poinct en poinct sur lobligation et ippoteque de touts leurs biens pñts et advenir quils ont sobmis aulx forces et rigueurs des cours et scaulx grand de Carcassonne Beziers Ginhac petit scel de Montpellier et (cours) ordinaires de parties et a une et chacune dicelles en seul renoncant a tout droict par lequel pourroient contravenir au conteneu du presant instrumant et ainsy lont promis et juré aulx saincts evangiles nostre seigneur dieu manuellement touchés ne y contravenir.

Faict et recité aud Olmet et maison desd CALVIN pñts a ce M° Jehan ALBINHAC pbre (prêtre) et chau.. dud Lodeve de Sr Laurent JAUZIONS de Jacques ARGOUY dAmbairan soubznés lesd parties ont dict ne scavoir escripre et moy Philippe BRUN nõre royal dud Lodeve soubzné

J ALBINHAC tesmoing, JAUSYONS, J ARGOUY, BRUN Nõre

Et faict incontinant constitués en leurs personnes lesd Fulcrand et Jehan CALVINS freres desmerans touts en commung et led Fulcrand CALVIN mary de lad Marguerite PELENE ont dict et confessé avoir eu et illec reallemant receu dud Arnaud PELEN paire de lad Marguerite y pñt et estipulant la somme de quatre vingts livres ts en piesses de dix souls douzains et autre monoye blanche que aussi une robe drap de colleur viollet une couverte laine deux linseuls et une petite caisse fermée a clef que ont promis rendre et restituer

Pñts a ce lesd ALBINHAC JAUZIONS et ARGOUY soubsnés lesd CALVINS ont dict ne scavoir escripre et moy dict BRUN notaire

J ALBINHAC tesmoing, JAUSYONS, J ARGOUY, BRUN Nõre

Aussi et tout incontinant constituée en personne la susd Marguerite PELEN laquelle sachant avoir esté bien et demerant adobtée (2) et ap..rée des biens de sond paire ayant esgard aulx charges que sont a pñt ausd biens a ceste cause lad Marguerite PELEN laquelle de licence et bon voulloir de Fulcrand CALVIN son mary et les licences maritelles quand a faire lesd choses soubs escriptes luy donnant, a quicté cedé remis et relauxé comme de pñt quicte cede remet et relauxe aud Arnaud PELEN sond paire y pñt et estipulant touts autres droicts et biens paternels maternels et fraternels et autres quelsoncques (!)

Pñts que dessus et moy dict BRUN nõre

Notes (1) monoye blanche: monnaie d'argent (2): adobtée: elle a reçu la dot