Dette Quittance SALASC FLEURY

Actes divers passées André SALASC 1380 G 11* de Valquières

Note *: On retrouve la trace de cet André SALASC sur une période longue, dès 1636 avec sa mère Catherine BELPEL (ce qui suppose qu'il encore jeune) puis seul en 1637 (pour un bail de bétail à mi-fruit, ci-dessous) jusqu'en 1679 au moins. Ses biens sont enregistrés au compoix de Dio, 27 parcelles et bâtis pour un alivrement de 2 livres 1 denier. Est-il l'André SALASC (1380 G 11) père de Jean, décédé avant 1703 quand son fils épouse Catherine ROBERT? Est-il également le père de deux autres fils, Henry, décédé avant 1705 quand son fils André épouse Magdeleine ROBERT, et Pierre SALASC, tous deux présents au mariage de leur frère Jean en 1703 ? Les recherches sur Bédarieux permettront peut-être de le savoir.

AD 34 2E 39/497 M° Guillaume BRUN notaire de Lodève (34)

le 4 juillet 1637 bail de bétail pour Pierre de FLEURY Seigneur de Dio

contre André SALASC de Valquières

Lan mil six cens trente sept et le quatriesme jour du moys daoust apres midy regnant le prince que dessus dans Lodeve pardevant moy nõre royal soubzné et pñs les tesmoings soubz escripts a esté personnellement estably André SALASC habitant du lieu de Valquiere jurisdiõn du lieu de Dio dioceze de Beziers lequel de gred a dict et confessé tenier a miege et moytié fruicts de Monsieur Mre Pierre FLEURY seigneur dud Dio habitant dud Lodeve icy pñt et stipullant, scavoir est la quantité de vingt cinq bestes de parc quest quinze brebyes de port, troys chevres aussy de port et sept anieaux ou anielles faizant en tout lesd vingt cinq bestes lesquelles led SALASC a dict et declairé avoir heu et receu dud Sieur (et) len a quitté

Et cest [Renvoi: pour le temps et terme de cinq années complettes et revollues qui commenseront a la prochaine feste St Michel et a semblable jour lesd cinq années faictes finiss.. (?)] avec les pactes suyvants scavoir que led SALASC sera tenu advertir chacune année led Sieur de Dio a la saizon quil fauldra thondre led bestail et estant thondu la layne et avec quy en proviendra se partaigera esgallement et sera renu donner et payer chacune année aud Sieur et a chacune feste de la Magdalaine pendant lesd cinq années pour chacune brebys portant layne deux livres fromaige et pour chacune chevre aussy portant layne deux livres (fromage) bon et sec davantaige a esté accordé que led SALASC sera tenu de bien et duement entretenir led bestail en bon mesnager et pere de familhe et au cas viendra (une bête) a se perdre a son deffault ou pour ses affaires sera tenu le payer a sa legitime valleur lors de la perte et au contraire se perdant par maladie ou autre par cas fortuyt sera quitte en rendre la peau ou (...) Et estant au bout desd cinq ans lesd vingt cinq bestes et aigneaux quy en sera proveneus se partaigeront esgallement entre partyes

Et pour lobservaõn de ce dessus led SALASC a obligé et ipothecqué touts ses biens et par expres led bestail et aigneaux qui en proviendra quil tiendra en preccaire et fo... de constitution jusques en fin de terme quil a soubzmis aux rigueurs desd Cours et scels royaulx grand (scel) de Carcassonne Beziers petit scel de Montpellier et ordinaire des partyes ainsy la juré Faict et recitté dans la maiõn dud Sieur presents Mr Thomas VIVAREILH bourgeois dud Lodeve et Guillaume CROUZET dict guillemet du mazaige des Mollieres soubznés avec partyes et moy Guillaume BRUN nõre royal dud Lodeve soubzné.

FLEURY, A SALASC, VIVAREL, CROUSET, BRUN nõre royal

AD 34 2E 39/509 M° Guillaume BRUN notaire de Lodève (34)

le 16 août 1650 Dette de 280 £ pour Noble Jean de FLEURY Seignieur de Dio et Valquières

contre André SALASC de Valquieres

Lan mil six cens cinquante et le seitziesme jour du moys daoust apres midy regnant le prince que dessus dans Bedarieux dioceze de Beziers pardevant moy notaire royal soubzné pñs les tesmoings soubz escripts a esté personnellement estably André SALASC habitant du lieu de Valquieres jurisdiõn du lieu de Dio aud dioceze lequel de gred a dict et confessé debvoir a Messire Pierre de FLEURY Seigneur dud Dio et Valquieres Chevallier Conseiller du Roy Trezorier General en la Generalitté de Montpellier absent Mr Guillaume BAUDOUY Marchant habitant dud Lodeve pñt et acceptant pour led Sieur la somme de deux cens quatre vingts livres ts pour cauze de prest que led Sieur de Dio luy en a faict presentement en escus blancs quarts descus et autres monnoyes a luy deslivrée par led Mr BAUDOUY des propres deniers dud Sieur de Dio faizant lad somme de deux cens quatre vingts livres qui a esté receue et par led SALASC et a lintant deslivrée en mesmes especes au Sieur Claude BASSET bourgeois dud Bedarieux icy pñt quy la receue en pñce de moyd notaire et tesmoings pour et en payement de pareilhe somme quicelluy SALASC luy doibt, scavoir

cent vingt troys livres comme cessionnaire et ayant droict et cauze de Mr Anthoine AMANS chirurgien en laquelle Catherine BELPEL mere dud SALASC et luy se seroient obligés au proffit dud AMANS par contract du dernier septembre mil six cens trente six receu par Me Davyd MOLINIER nõre dud Bedarieux cedé aud Sieur BASSET par led AMANS contract receu par led MOLINIER le quinziesme aoust mil six cens quarante ung pour assurance de laquelle somme lad BELPEL et SALASC auroient bailhé par engaigement aud Sieur BASSET les pieces esnoncées au contract (...) passé receu par Me Lacques LAVIT motaire dud Bedarieux le vingtiesme decembre mil six cens quarante deux
cent sept livres six deniers contenue en autre cession dung decret poursuivy par led Mr BAUDOUY en qualitté de Collecteur dud Dio dauthoritté des Officiers ordinaires tant sur les pieces engaigées que autres biens dud SALASC le contract de cession receu par Me COMBAL notaire de Lunas le vingt quatriesme avril mil six cens quarante trois receu et executté le mesme jour au proffit dud Sieur BASSET
quarante livres aussy deue par led SALASC aud Sieur BASSET par obligaõn du vingt cinquiesme octobre mil six cens quarante sept receue par Mr VERNIE aussy notaire dud Bedarieux
et le surplus (dix livres) pour reste du prix des arrentemens desd biens jouys par led SALASC despuys les engaigements et cession de decret jusques a ce jourhuy

De quoy led Sieur BASSET estant comptant et satisfaict en a quitté led SALASC et promis ne luy jamais rien demander pour ce reguard consentant que les contracts des susd obligaõns soient cancellés et barrés par teneur de cest acte donnant pouvoir aux notaires quy les ont receus dy proceder au seul veu de lextrait du pñt sans autre mandement et en tant que de besoing led Sieur BASSET a (...) subrogé led Sieur de Dio a son lieu place droict action et ippotheque pour lesd sommes pour sen servir ainsy quil appartiendra sans toutesfoys luy estre tenu daulcune es..tion et garantye ny restituõn de deniers que pour la loyauté des debtes tant seullement pour quelque cauze et pretexte ny occazion que ce soict a quoy led Mr BAUDOUY acceptant pour led Sieur de Dio reconnoit par depresent et a toutes garantye de droict et de faict car autrement led Sieur BASSET sans ceste clauze et condiõn nauroict faicte lad subrogaõn auquel (...) led Sieur BASSET a remis au pouvoir dud Sieur BAUDOUY les expediés des susd contracts desd jours dixiesme septembre mil six cens trente six, quinziesme aoust mil six cens quarante ung, vingtiesme decembre mil six cens quarante deux, le grossoye dud decret, lacte de cession dicelle en original et mize a possession du vingt quatriesme avril mil six cens quarante troys loriginal de lobligaõn dud jour vingt cinquiesme octobre mil six cens quarante sept lacte darrentement desd biens faict le vingt huitiesme octobre mil six cens quarante neuf escript et signé par led Sieur BASSET signé aussy par lesd SALASC VALLETTE et OLLIER tesmoings avec lextraict dautre contract portant compte final passé dentre Sieur Jean BASSET vieulx son pere avec led SALASC vieulx par led MOLINIER notaire le vingt sixiesme julhet mil six cens trente six ensemble (avec) les troys contracts esnoncés en icelluy en original le tout receu et rettenu par led MR BAUDOUY

Avec pacte accordé par expres que led SALASC se charge payer et acquitter a ses despens le droict de lods deubs par led Sr BASSET a raison du susd decret et dud engaigement en cas en seroict deub et oultre ce les uzaiges diceulx biens decrettés et engaigés despuys led engaigement et decret jusques ce jourdhuy et du tout en tenir quitte et descharge led Sr BASSET ce quy a esté ainsy et par expres conveneu accordé et stippullé dentre lesd partyes et led Mr BAUDOUY quy a eccepté le payement dud droict de lods et uzaiges sur led SALASC et promis aud Sr BASSET quil ne luy en sera jamais faict demande et le fere tenir quitte du tout envers led Seigneur de Dio et tout autre quil appartiendra et led SALASC a promis rendre et restituer la susd somme de deux cens quatre vingts livres [Renvoi: aud Sieur de Dio] de ce jourd'hui en ung an complet sans prejudice aud Sieur de Dio des que led SALASC luy peult debvoir dalliener et pour lobservaõn de ce dessus (les) partyes chacune comme luy concerne ont obligé et ippothecqué leurs biens souzmis aux rigueurs des Cours et Scels royaulx grand (scel) de Carcassonne Beziers petit scel de Montpellier et ordinaire des partyes et ainsy lont promis et juré

Faict et recitté dans la maiõn dud Sieur BASSET pñs a ce Mr Guillaume ARNAL marchant et Samuel VABRET Me cordonnier hab dud lieu soubznés avec partyes et moy Guillaume BRUN notaire royal habitant dud Lodeve soubzné.

BASSET, SALASC, BAUDOUY, G ARNALH, S VABRET, BRUN, notaire

AD 34 2E 39/509 M° Guillaume BRUN notaire de Lodève (34)

le 17 août 1650 Achat de Pierre ARNAUD de Dio

à André SALASC de Valquieres

Lan mil six cens cinquante et le dixseptiesme jour du moys daoust apres midy regnant le prince que dessus au lieu de Dio dioceze de Beziers pardevant moy nõre royal soubzné pñs les tesmoings soubz escripts a esté personnellement estably André SALASC habitant de Valquieres jurisdiõn dud Dio lequel de gré et par teneur de ce contract irrevocable a vendu cedé remis transporté comme de pñt vend cede remet et transporte a vente peure a Pierre ARNAUD laboureur habitant dud Dio icy pñt stipullant et acceptant tant pour luy que les siens a ladvenir scavoir est partye dune sienne piece de terre champ et jonquas de contenance de deux jornées de beufs a laborer ou envyron assize au terroir dud lieu et tenement dels Frigoulles confrontant d aguial led vendeur du terral led achepteur marin les terres vaccantes et avec ses autres confrontaõns plus legitimes et vrayes sy point en y a une avec ses entrées issues et servitudes droicts libertés et appartenances universelles entieres et arrestées pour en fere et dispozer a ses plaizirs et vollontés tant a la mort qua la vye la luy bailhant quitte de toutes charges du passé jusques a ce jourdhuy Ayant esté accordé que led ARNAUD prendra la moytié du compoix et uzaige de lentiere piece pour la payer a ladvenir declairant led SALASC estre mouvante (sa terre relève) de la directe et seignieurie du Seignieur dud lieu a luzaige qui se trouvera et recognoistre lieu et terme accostumé de payer dizant moyenant (...) ne le scavoir

Et la pñte vente de la susd moytié de piece a faite led SALASC aud ARNAUD pour et moyenant le prix et somme entre eulx convenu et accordé de vingt livres ts laquelle somme de vingt livres led SALASC a dict et declairé avoir heue et receue cy devant dud ARNAUD len a quitté et promis ne la luy plus demander ny autre chose a raiõn de lad vente luy donnant licence den prendre quand bon luy semblera la vraye realle actuelle civille corporelle possession et jouissance et jusques a (ce) faict a promis la tenir dud achepteur en precaire et force de constitution et luy a donné toute plus vallue en cas et en amont (?) pñte et future quelle que ce soict par donnaõn entre vifs peure et irrevoccable hors quen doist oultre moytié du juste prix (?) et sen devestissant en a investy et saisy led achepteur par le bailh de la plume de moy notaire faicte de main a main avec promesse la luy fere valloir et tenir et luy estre tenu de caution (?) et garantye envers et contre touts en cas de trouble Et pour lobservaõn de ce dessus led SALASC a obligé et ippothecqué ses autres biens soubzmis a toute rigueur de justice et ainsy la promis et juré

Faict et recitté dans le chasteau dud lieu pñs a ce Mre Thomas FERRIER prieur dud lieu et Guillaume BAUDOU marchand de Lodeve soubznés avec led SALASC led ARNAUD ne saichant escripre et moy Guillaume BRUN notaire royal dud Lodeve soubzné

SALASC, FERRIER, BAUDOU, BRUN notaire

AD 34 2E 39/602 M° Jacques BRUN notaire de Lodève (34)

le 9 janvier 1673 Debte pour Noble Jean de FLEURY Seignieur de Dio et Valquieres

contre André SALASC de Valquieres

Lan mil six cens septente trois et le neufiesme jour du mois de janvier appres midy regnant le prince que dessus dans Lodeve pardevant moy nõre royal soubzné presans les tesmoings soubz escripts a esté personnellement estably André SALASC habitant du lieu de Valquieres jurisdiõn du lieu de Dio dioceze de Beziers lequel de gred a dict et confessé debvoir et estre tenu payer a Noble Jean de FLEURY seignieur dud Dio et Valquieres Conseiller du Roy son Recepveur particulier des tailhes du prezant dioceze icy presant stipullant et acceptant la somme de cent septente six livres pour cauze de prest que led Sieur de Die luy a faict reallemant receu par led André SALASC en bonne monoye
scavoir cent vingt six livres qui a esté deslivrée a Mr François SALASC habitant dud lieu de Dio pour entier et parfaict payement de la somme de trois cens livres deue par led André SALASC aud François pour les cauzes contenues au contract passé par Me LAVYT (?) nõre de Bedarieux le sixiesme jour du mois de novembre mil six cens trente huit pour assurance de laquelle luy feut bailhé par enticreze (antichrèse) a tiltre dengaigement une piece champ assize au terroir dud Valquieres et tenemant de Campels plus autre piece champ assis au mesme terroir et tenemant del Crues (?) plus deux preds assis au tenemant de Prades joignans meurailhe au milheu plus une maison joignant lesd preds plus autre piece champ assise aud tenemant de Prades finallement autre champ aud tenemant de Prades le tout confronté et dezigné aud contract dengaigement et cinquante livres pour les droicts des lodz deubs pour raison dud contract dengaigement faizant lad somme de cent septante six livres
laquelle somme de cent vingt six livres led François SALASC en estant comptant et payé pour entier payement de lad somme de trois cens livres a consenty mis et subrogé led Sr de Valquieres en son lieu place droict action et yppothecque pour lad somme de cent vingt six livres pour son assurance sans touttefois que led François SALASC luy soict tenu (...) ny garantye que pour la loyauté du debte a laquelle led Sieur de Valquieres a renoncé par express
Laquelle dicte somme de cent septante six livres led SALASC debiteur a promis rendre et restituer aud Sieur de Valquieres de ce jourdhuy en un an complet et consant que led Sieur de Valquieres soict subrogé aud engaigement pour son assurance et jusques quil en sera payé et entierement satisfaict sans prejudice aud Sieur de Valquieres dautres yppotheques quil a contre led André SALASC son debiteur ayant led Sr François SALASC deslivré aud Sieur de Valquieres lextraict dud contract dengaigement
Et pour lobservaõn de ce dessus led André SALASC a obligé et yppotheqcqué tous ses autres biens soubzmis aux rigueurs des Cours et Scels royaux grand (scel) de Carcassonne Beziers petit scel de Montpellier Ginhac et ordinaire des partyes et ainsy lont promis et juré
Faict et recitté dans la maison dud Sieur de Valquieres presans a ce Me Guillaume BAUDOUY bourgeois et Me Guillaume BRUN advocat en la Cour ordinaire dud Lodeve soubznés avec partyes et moy Guillaume* BRUN nõre royal dud Lodeve soubzné

FLEURY, SALASC, DESALASC F(rançois), BAUDOUY, BRUN, BRUN nõre

*Note: le greffier a repris par erreur le prénom de l'ancien notaire, Guillaume BRUN qui a cessé de passer des actes après le 17/7/1672. Il s'agit bien de Jacques BRUN.

AD 34 2E 39/602 M° Jacques BRUN notaire de Lodève (34)

le 9 janvier 1673 Quittance pour le dit André SALASC

contre Me François SALASC de Dio

Lan mil six cens septante trois et le neufviesme jour du mois de janvier apres midy regnant le prince que dessus dans Lodeve pardevant moy nõre royal soubzné presans les tesmoings soubz escripts
a esté personnellement estably Me François SALASC habitant du lieu de Dio dioceze de Beziers lequel a dict et confessé avoir esté payé et entierement satisfaict de André SALASC habitant du lieu de Valquieres jurisdiction dud lieu de Dio icy presant stipullant et acceptant de la somme de trois cens livres ts en .... en laquelle led André SALASC luy estoit debiteur et obligé par contract du sixiesme novembre mil six cens trante huict receu par Mre LAVYT (?) nõre du lieu de Bedarieux contenant engaigement des pieces y mentionnées
duquel engaigement led Mre François SALASC a faict cession et transport a Noble Jean de FLEURY Seignieur de Dio et Valquieres qui a faict prest aud SALASC debiteur de la somme de cent vingt six livres quy estoit deube de reste comme rezulte par le contract de debte receu par moy nõre ce jourdhui de laquelle somme de cent vingt six livres pour entier payement dud engaigement led Mre François SALASC en a quitté led André SALASC
Et promet aud François de luy rapporter quittance des tailhes impozées aud lieu de Dio de diversses années scavoir du Sieur Bernardin VALETTE de la somme de vingt neuf livres six sols onze deniers, de Jean ARCHIMBAUD de Vernazobres de lannée mil six cens septante et septante un de la somme de quinze livres seitze sols et de André RODIER collecteur de lannée derniere mil six cens septante deux, et Mre Estienne VALETTE viguier des années mil six cens quarante neuf, cinquante et cinquante un, de Estienne RODIER de lannée mil six cens quarante huict, sans prejudice de celles que led André SALASC peut debvoir aud Mre François SALASC qui se rezerve par expres et cest entre icy et la feste sainct Michel prochaine et pour lobservaõn de ce dessus partyes chacune comme les concerne ont obligé et ippothecqué leurs biens soubzmis a toutes rigueurs de justice et ainsy lont promis et juré.
Faict et recitté dans la maison dud Sieur de Valquieres presans a ce Mre Guillaume BAUDOUY Bourgeois et Mre Guillaume BRUN advocat en la Cour ordinaire dud Lodeve soubznés avec partyes et moy Jacques BRUN nõre royal de lad ville soubzné.

DESALASC (François), SALASC (André), BRUN, BAUDOUY, BRUNJ Nõre

AD34 2E 39/607 F° 214 M° BRUN Jacques notaire de Lodève

Le 13 septembre 1679 Renouvellement d'hypothèque à André SALASC de valquières

par Jean et Gabriel de FLEURY Seigneurs de Dio et Valquières

Renouvellement dippothecque pour Messire Gabriel de FLEURY Baron de Perignan Seigneur de Dio et Valquieres contre Me André SALASC du lieu de Valquieres

Lan mil six cens septente neuf et le troiziesme jour du mois de septembre appres midy regnant le prince que dessus dans le chasteau du lieu de Dio dioceze de Beziers par devant moy nõre royal soubzné presans les tesmoings soubz escripts a esté personnellement estably Me André SALASC habitant du lieu de Valquieres jurisdiõn dud lieu de Dio lequel saichant estre debiteur envers Messire Gabriel de FLEURY baron de Perignan seigneur desd lieux de Dio et Valquieres Conseiller du Roy en la souveraine Cour des Comptes aydes et finances de Montpellier en qualitté dheritier de feu noble Jean de FLEURY seigneur desd lieux de Dio et Valquieres aussy Conseiller du Roy et son Recepveur particulier des tailhes du dioceze de Lodeve son pere scavoir de la somme de six cens cinquante huict livres deux sols scavoir

deux cens huictante livres par obligaõn (ci-dessus) receue par feu Me Guillaume BRUN nõre dud Lodeve le seitziesme aoust mil six cens cinquante
cinquante livres par autre obligaõn receue et originellement deslivrée par led feu Me BRUN le sixiesme septembre mil six cens cinquante un
vingt cinq livres par une promesse escripte et signée par feu Mr Bernard VALETTE et dud SALASC et BONNAFOUS en datte du neufviesme octobre mil six cens cinquante trois
cent septente six livres par autre obligaõn (ci dessus) receue par moy nõre le neufviesme janvier mil six cens septente trois et
cent vingt sept livres de reste dune obligaõn receue et originellement deslivrée par Me Michel MARTIN nõre royal dud Lodeve le vingt neufviesme aoust mil six cens septente cinq

revenant toutes lesd sommes a la premiere de six cens cinquante huit livres deux (sols ?) laquelle susd somme de six cens cinquante huit livres led SALASC a promis de payer aud Sieur de FLEURY icy presant stipullant et acceptant a la feste St Genieys prochaine avec lintherest dicelle a lordonnance se rezervant led Sieur de FLEURY ses premiers ippothecques par express pour la prioritté du temps et pour lobservaõn de ce dessus led SALASC a obligé et ippothecqué tous et chacuns ses biens soubzmis aux rigueurs des Cours et Scels royaux grand (Scel) de Carcassonne Beziers Gignac et ordinaire des partyes et ainsy la promis et juré
Faict et recitté où que dessus presans a ce Mr Jean ARNAUD marchand habitant dud Lodeve et Mr Estienne VALETTE habitant dud lieu de Die soubznés avec partyes et moy Jacques BRUN nõre royal dud Lodeve soubzné

FLEURY, SALASC, ARNAUD, VALETTE, BRUN nõre