AD 42, Me REYNOD, notaire de Chevrieres

Donation le 30 août 1682 pour Jean DUMAS par son père

Benoist DUMAS marchand de Montucla, 3750 G 12

Pardevant le nõre royal soubzné et presents les tesmoins bas nommés, fust present honneste Benoist DUMAS marchand du lieu de Montucla parroisse d Aveyzieu   lequel de gré voulant tesmoigner lamitié paternelle qu'il porte a Jean DUMAS son fils et de deffuncte Claudine MICHA   et recognoissant les bons et agreables services quil a receu luy et quil espere luy estre continués   de la preuve desquels il le releve par les presentes   luy a donné par donnation pure simple et irrevocable faicte entre vifs de present et a toujours valable   la moitié par indivis de tous ses biens meubles et immeubles presents et advenir en quoy quils concistent   a la charge de payer la moitié de tous ses debtes charges reelles et foncieres   se reservant l'autre moitié pour en faire et disposer comme bon luy semblera   et en cas de non disposition, led DUMAS la donne a sond fils par mesme et semblable donnation que dessus   a la charge de payer et acquicter tous ses debtes charges et legats et de le faire enterrer honnestement   sen remectant pour ses prieres et aumosnes a la volonté et discretion de son donnataire   lequel icy present et de lauthoritté de sond pere accepte la susd donnation aux charges et conditions y portées   faisant led donnateur au proffict dud donnataire de sesd biens donnés les devestitures et investitures constitution de nom et tiltre de precaire, consentant que les presentes soyent insignuées où besoing sera   et pour cet effect a constitué son procureur le premier porteur d'icelles avec promesses d'avoir le tout pour agréable et ny contrevenir par obligation de biens soubzmission renonciation

Faict aud lieu de Monticla maison d'habitation dud donnateur le trentiesme aoust avant midy mil six cents quatre vingts deux   en presance de Sr Anthoine Joseph MOLENCHON fils a feu Me Jean MOLENCHON vivant nõre royal dud Aveyzieu, de Mre Jacques FRESSE pbre vicaire dud Aveyzieu , Magdelain BERGIER laboureur dud lieu, tesmoins requis desquels lesd Mre FRESSE et MOLENCHON ont signé, et led BERGIER a declairé avec lesd donnateur et donnataire ne scavoir signer enquis et sommés, adverty de faire sceller dans le mois a peine de l'edict

MOLENCHON,   J.FRAISSE,   REYNOD nõre royal