AP 69 Famille CHEVRON et Généagier

Le 29 janvier 1559 donation de Françoise MITTE 58435 G 16

pour Pierre CHEVRON et Marie TELLUSSON 29216 & 29217 G 15

Co-transcription de S. BATIGNE et C. CHOMAT

Nous Garde du scel commun royal estably aux contrats es Balliage de Mascon et Senneschaulcée de Lyon   A tous pñs et advenir salut   scavoir faisons que par devant Jehan MURIGNIEU notaire royal de Sainct Simphorien le Chastel soubzigné et en pñce des tesmoings requis cy appres nommés   establye et constituée en sa personne hõn femme Françoise MICTE femme a Michel TELLUSSON du lieu des Olmes parroisse de Pomeys   de lauthorité congé et licence dudict Michel TELLUSSON son mary pñt et quant à la passation des pñtes l autorizant   procedant de son bon gré pour elle ses hoirs et successeurs advenir quelconques   considérant les agréables services que faicts luy ont esté et qu'elle espère que faicts le seront pour l'advenir par Pierre CHORON son gendre et Marie TELLUSSON sa femme et filhe de lad MICTE dud lieu des Olmes parroisse de Pomeys   de la preuve desquels elle la relevé par ces pñtes   A ceste cause et autres a ce la mouvant   a donné et donne par donnation pure simple et irrevocable faicte entre vifs appres le decedz de lad donnatrice et non devant valallable ausd Pierre CHORON et Marie TELLUSSON sa femme combien que lad Marie soict absente   le dit CHOVRON pñt acceptant et humblement la merciant   à leurs prouffit et à leurs hoirs et successeurs advenir quelsconques   assavoir de tous et ung chacuns ses biens meubles et immeubles droicts noms et actions pñs et advenir quelsconques quelque part quils soient et se puissent trouver   soubz les pactes et retencions quy sensuivent   Assavoir que la dicte donnatrice retient reserve et distraict de la pnte donnation la somme de vingt livres tournois et deux asnées vin   laquelle somme et vin ladicte donnatrice a donné et donne par semblable donnation que dessus a Simphorienne et Anne filhes de Nycolas VAGANEYS et de feue Jehanne TELLUSSON filhe de la dite donnatrice   a chascune desd Simphorienne et Anne dix livres tournois et une asnée vin quelle veult et ordonne leur estre payés par sesd donnataires touttefoys (...) quelles seront collocquées par mariage   et où lesd Simphorienne et Anne iroient de vie a trespas sans enfans naturels et légitimes procréés en loyal mariage   veult lad donnatrice que lesd vingt livres tournois soient et demeurent ausd mariés CHORON donnataires   et où lune dicelles iroyt de vie a trespas sans enfans naturels et legitimes procréés en loyal mariage comme dict est   veult que la somme de dix livres tournois et asnée vin soient et demeurent ausd mariés CHORON donnataires comme dessus   Aussi retient et reserve et distraict de la pñte donnation dix livres tournois quelle veult estre employés pour ses frais funeraires quand elle decedera   A la charge aussi de paier cinq sols tournois de pension ou rente annuelle ou bien cinq livres tournois paié a perpetuité (...) au curé ou vicaire de Pomeys pour la fondation de deux messes (...) par elle fondées en lad esglise de Pomeys comme elle dict apparoir par la fondation (...) receue par RODDON notaire royal de Chazelles   Soubz lesquelles retentions la dicte donnatrice a faict desd biens sus donnés au prouffit desd donnataires les devestitures investitures translations de droict constitution de precayre et aultres clauses de (...) et (...) a ce requises et necessaires   Promectant pour ce lad donnatrice de laucthorité et comme dessus constituer par ses foy et serment (...) faict et presté aux Saincts Evangilles de dieu et soubz obligation et yppoteque de tous et ung chacuns ses biens meubles et immeubles droicts noms et actions pnts et advenir quelconques   la pñte donnation et tout le contenu aux pñtes avoir ferme et vallable et agréable sans y contrevenir   Avec re… de tous despens dommaiges et interets ny deffault antierement acomplir sellon ce que dict est   Et pour ce faire sest soubzmise et soubzmect a toutes cours royaulx et ordinaires de Lyon Forestz et a toutes aultres de ce royaulme de France lexequution de lune desdictes cours et juridictions pour laultre non, cessant renonceant en oultre a tous droicts canons et civils au droict velleyen et aultres droicts introduicts en faveur des femmes et mesme au droict disant generale renonciation ny valloir sy la specialle ne precedde.   Faict et passé audict Sainct Simphorien le Chastel le vingt neufviesme jour de janvier l an mil cinq cens cinquante neuf   y pñs hõn personnes Simphorien TELLUSSON marchant de Lyon et Jehan CHAREYSSIERE marchant dud Sainct Simphorien tesmoings a ce requis   En tesmoing desquelles choses, Nous Garde dud scel royal avons faict mectre et apposer led scel royal aux pñtes   certiffié aux parties faire informer les pñtes au greffe des insinuations estably en la ville de Lyon suyvant l'édit du Roy (...) sur les peynes y cõtenues.

Expedié au prouffit desdicts mariés CHORON donnataires et les leurs

MURIGNIEU