AD12 3E 7648 F° 76 Maître François MIQUALET Sévérac-le-Château (12)

Le 14 juin 1635 reconnaissance dotale de François BOURREL du Massegros

pour le mariage de

Pierre LADET et Jeanne BOURREL 3046 & 3047 G 12

Lan mil six cens trante cinq et le quatorziesme jour du moys de juing a la ville de Severac maison de Me Anthoine de MIQUALET docteur en droitz apres midy   regnant Louys tres chrestien prince par la grace de dieu roy de France et de Navarre   pardevant moy notaire royal soubzné et en la pñce des tesmoings bas nommés

A esté presant en sa personne Pierre LADET paysan du lieu de La Tieule de Barnassac en Gevaudan   lequel comme mary et maître des biens doctaux de Jeanne BORRELLE sa femme absante avec promesse de faire rattiffier sy besoing est quand sera requis   de gred et franq voulloir a recognu et confessé avoir heu et receu de François BOURREL paysan du village del Massegro fils et donnataire d' Estienne BOURREL son pere illec presant estippulant et acceptant   scavoir est la somme de six cens quatre vingts livres tz   deux robes lune drap de Sceau (?) et lautre sarge de Linestre (?)   et dix brebis de port   plus autre robe sarge de Linestre a lusaige de Plaisance LADETTE   le tout deub ausd LADET et BORELLE mariés   põr et entant moings (en déduction ?) du dot constitué a lad BORRELLE en faveur de son mariage par led Estienne BOURREL et Françoise VERDIER ses pere et mere   contract receu par Me QUARANTE nõre de La Canourgue le vingtneufvieme de may mil six cens trante ung

Laquelle ditte somme de six cens quatre vingts livres led BOURREL a payée reallement et de comptant presant moy notaire et tesmoings   en pistolles d' Espainhe Ytallie escus sol doubles ducats sequins et monoye parfaisant icelle   par led LADET comptée receue et amborcée quen a esté comptant et satisfait   et led BOURREL en a quitté ensemble desd robes et brebis   comme ayant aussi receu le tout sy devant avec promesse de ne luy en faire autre demande   Et advenant ca de restituõn que deffailhe et dieu ne permette   led LADET a promis et promet randre et restituer lad somme de six cens quatre vingts livres et autres choses susd a lad BORRELLE ou a qui de droiy appartiendra   et põr ce faire en a obligé et yppothequé touts et chacuns ses biens pñts et advenir qua soubzmis aulx riguieurs de touttes courts du pñt rouyaulme de France   par lesquelles a voulleu estre constraint ainsin que leurs tigueurs le veullent et requierent   et la juré

Fait et recitté où que dessus   de quoy led BOURREL a requis acte et instrument en estre retteneu et espedyé par moy nõre que luy a esté concedé   en presance du susd MIQUALET   Mre Anthoine LADET pbre chanoyne de Mirepoix et Pierre GUINOT marchand dud Severac soubznés avec lesd parties P. LADET, F. BOURREL, LADET, MIQUALET, P. GUINOT pñs ainsin signés a loriginal   et de moy François MIQUALET nõre royal hereditaire dud Severac soubzné qui ..

MIQUALET not royal