AD34 2E 39/362 M° BONYOL Jean Notaire de Lodève (34)
Le 31 janvier 1582 Testament d'Astrugue GELYE 12073 G 14
veuve de Guillaume VERNETTE Vieux 12072 G 14, Baille des Plans
L'église des Plans (34)
Au nom de Dieu soict faict amen, scaichent tous presens et advenir que l'an mil cinq cens quatre vingts et deux et le dernier jour du moys de janvier environ midy Henry par la grace de Dieu Roy de France et de Pologne (*) au lieu des Plans dioceze de Lodève Senechaussée de Carcassonne, par devant moy notaire royal soubz signé et presens les tesmoings soubz nommés
A esté presente et constituée en personne honneste femme Astrugue GELIE vefve de feu Mr Guillaume VERNETE vieulx Baille en son vivant dud lieu des Plans laquelle scaichant quil ny a choze plus certaine que la mort ny choze plus incertaine que lheure dicelle et quil convient soy despartir de ce monde ne scachant quand ny cõment et affin quel ne soyt surprise dicelle mort abintestat et que pour ladvenir entre les siens ne soict debat ny proces põr et a occasion de ses biens estant en ses bon sens et parfaicte memoire bien que soyt detenue de maladie corporelle a volleu fere et ordonner son dernier testement nuncupatif et sa derniere volonté nuncupative de ses ame corps et biens quil a plu a Dieu en ce monde luy donner en la forme et maniere que sen suyt.
Et premierement a faict le signe de la saincte croix en disant In nomine patris et filii et spiritus sancti amen et a recommandé son ame a Dieu le pere le fils et le sainct sperit a la glorieuse vierge Marie maire de nõre seigneur Jesus Christ et a tous les saincts et sainctes de paradis et que quant son ame sera separée de son corps veult et ordonne que sond corps soict inhumé et ensepvelly au cimitiere de lesglise parroissielle St Salveur dud lieu et au tombeau de sond feu mary ITEM veult et ordonne que ses honneurs funebres soient faictes tout ainsin et cõme sond feu mary en a ordonné par son dernier testement et a la discrection de son heritier infra script.
ITEM a legué et donné par droict de institution legitime et hereditaire portion et põr tous et chñs les droicts que Messire Jacques VERNETE [Renvoi: pretre et] vicaire perpetuel dud lieu, Guillaume VERNETTE jeune a present Baille des Plans, Astrugue VERNETE femme de Jehan ALMERAS dud lieu, Jehanne VERNETE femme a Laurens BERTHOMIEU de Pojols, Magdalene VERNETE femme de Pierre FORMITS du Mas de Carle et Catherine VERNETE femme de Berthelemy HUGONENC de Solages ses enfens et filhies legitimes et naturels et dud feu Guillaume VERNETE son mary põr tous droyts quils pourroyent demander et leur appartenir en sesd biens, scavoir est a ung chescun de sesd enfens et filhes susnõmés la somme de dix souls ts et avec ce les a faicts ses heretiers particulliers et que ne puyssent aultre choze demander en sesd biens payable a ung chñs lad somme une foys tant seullement appres son deceds, ITEM a legué a Guillaume GELY son frere põr semblable droict la somme de cinq souls ts avec lesquels la faict son heretier particullier, ITEM a legué et donné a tous ses nepveus, niepces, parens et consanguins et a tous autres quelle seroit tenue leguer et donner entre tous deux souls et six deniers ts põr tous lesd droicts et payables comme dessus et avec ce les a faicts ses heretiers particulliers [Renvoi: et que ne puissent rien demander en sesd biens]
En tous et chñs ses biens meubles immeubles presens et advenir, droicts noms et actions quelconques a faict et institué son heretier universsel et de sa propre bouche nõmé Estienne VERNETE son fils legitime et naturel et de sond feu mary par lequel veult ses debtes et legats contenus au present testement estre payés faicts et accomplis. Executeurs de son ame et present testement a faict Jehan PIERRE dud lieu et le curé de lad esglise quest de present ou sera au temps de son deces, lesquels et ung chñs deulx est permis a contraindre sond heretier põr accomplir le conteneu a son pñt testement, lequel a dict estre son dernier testement et derniere volonté nuncupative et veult que vaille par maniere de dernier testament, codicille ou donnation a cause de mort et par tout autre mellieur moyen que de droict pourra valloit. En a recogneus et priés les tesmoings soubznommés leur souvenir de sond pñt et dernier testement põr en temps et heure porter tesmoignaige de verité et a moyd notaire luy en retenir acte et dexpedier instrument a sond heretier et autres que besoing sera ce que luy ay accordé.
Faict et recité publiquement aud lieu des Plans et maison dud feu VERNETE où lad testatrice habite en pñces de Loys VIALA des Ribes soubzné, Michel PONS de Lodeve, Jehan ALBERT charpentier, Jehan BADRE jeune, Jehan BOSC, Pierre BELLECAVE et Fulcrand ROUX dur lieu des Plans qui ne scavent scripre Ont faict leur merque et moy Jehan BONYOL notaire royal du nombre des reduicts natif et habitant dud Lodeve qui requis ai receu et re... le pñt instrument et (...) me suys soubzné.
Ainsin receu et recité VIALLA, BONYOL Nõre royal
M.P. merque de Michel PONS, L, merque de ALBERT, + merque de BELLECAVE, (Plume horitontale) merque de ROUX, X merque de BOSC, (Trait horizontal) merque de BADRE
Note: Il s'agit d'Henry III, qui avant que ne commence son règne (1574-1589) avait été élu roi de Pologne, la couronne de ce pays étant devenue élective en 1572. Cela figure dans sa titulature officielle même s'il est resté sur le trône de France.