AD 34, 2E 39/491 M° Guillaume BRUN Notaire de Lodève
11 juin 1631 Testament d'André JEAN 3036 G 12 de Fozières (34)
Testement de André JEAN fils de feu Blaize du Terondel
Lan mil six cens trente ung et le onziesme jour du moys de juing envyron midy regnant le prince que dessus au mazaige du Terondel jurisdiõn de Fozieres dioceze de Lodeve pardevant moy nõre royal soubzné et pñs les tesmoings soubz escripts a esté personnellement estably André JEAN fils de feu Blaize laboureur habitant dud mazaige du Terondel, lequel estant malade dans son lyt dettenu de maladie corporelle delaquelle doubte mourir quoy nonobstant sain de ses sens memoire et entendement par la grace de dieu considerant la vye de ce monde qui est miserable et quil ny a choze plus certaine que la mort ny plus incertaine que lheure dicelle desirant pourvoir au salut de son ame dispozer et ordonner des biens que dieu luy a donnés en ce monde afin que apres son deces narrive proces ny debat entre ses heretiers et successeurs de son gred tout dol et fraulde cessant a faict et ordonné son dernier testement nouncupatif et derniere disposition de ses biens comme sensuyt.
En premier lieu a recommandé son ame a dieu le pere tout puissant a Jesus Christ son fils et au sainct esprit, les priant luy faire misericorde des offences quil a comis en ce monde et comettra jusques a lheure de son trespas, implorant a se faire les suffraiges de la glorieuse vierge Marie et de touts les saincts de paradis renonçant a lennemy de nature et a toute sa puissance en faizant le signe de la saincte croix sur sa personne disant in nomine patris et filii et spiritu sancti amen et a voulu et ordonné apres que son ame sera separée de son corps icelluy soict enterré au cimitiere de lesglise parrochielle du lieu de Somont et thombeau de ses predecesseurs et qua sa sepulture soient appelés trois pbres (prêtres) a la neufvene neuf et au bout de lan sept a ce quils prient dieu pour son ame et de ses parens predecedés
Sy veult et ordonne icelluy JEAN testateur que Marie VINAGRE sa mere soict maistraisse et seignieuresse et ususfructuairix de la moytié de touts et chacuns ses biens meubles et immeubles sa vye durant sans rendre compte ny prester le reliqua Item veult aussy et ordonne que Marie CAISSANNE sa femme bien aymée soict maistraisse et uzusfructuairix de lautre moytié de sesd biens sa vye durant vivant en honneste viduitté non autrement sans rendre compte ny prester le reliqua a condiõn que son heretier soubz escript et ses autres enfans seront nourris et entretenus de lususfruict diceulx biens et cest en recompence des agreables services que luy a rendus (et) espere que continuera cy apres, moyenent ce la faicte son heretiere particulliere et que soict comptente de touts ses autres biens.
Item a legué et donné pour tout droict dinstituõn et hereditaire portion que Jean et André JEANS ses enfans legitimes et naturels et de lad CAISSANNE sa femme pourroient avoir ou prethendre en sesd (biens) a chacun la somme de cinquante livres ts payable en troys payes esgalles comansant la premiere lors quils seront en eaige competent de la recepvoir et les autres deux ans apres et moyenent ce veult que quittent son heretier universel soubz escript les faizant ses heritiers particuliers. Item legué au posthume en cas sad femme seroict enseinte soict masle ou femelle pareilhe somme de cinquante livres que a ses autres enfans et a mesmes payemens moyenent laquelle la aussy faict son heretier particullier. Plus a legué et donné a ses seurs nepveux niepces et a touts autres prethendans droicts en sesd biens en touts cinq sols entre eulx a diviser payables apres son deces moyenent lesquels veult aussy que ce comptentent.
En touts et chacuns ses autres biens noms droicts voix actions meubles immeubles pñs et advenir où que soient et puissent estre assis et scittués aud testateur appartenents son heretier universel et general a faict led André JEAN testateur et la nommé de sa propre bouche scavoir est Pierre JEAN aussy son fils legitime et naturel et de lad CAISSANNE sad femme pour de lad heredicté jouir uzer faire et dispozer a ses plaisirs et volontés tant a la mort qua la vye saulf sil venoict a deceder sans enfans legitime ou sans faire testement en ce cas luy substitue led Jean et arrivant la mesme choze dicelluy Jean, led André et dud André au posthume, par lequel heretier ou substitut veult et enthend que soict satisfaict aulx leguats que dessus et autres debtes quapparestront estre legitimement deubs, tuteurs des personnes et biens de sesd enfans et heritier a faicts et nommé Pierre CAISSO son beau pere du mazaige de Sainct Jullien et Clement SAUCLIERES son cousin dud lieu de Fozieres , cassant et revocant touts autres testemens codicilles donnaõns ou autre derniere dispoziõn faicte a cauze de mort son pñt testement demeurant vallable et autre en la meilheure forme que testement peult valloir de droict declairant quil ne veult ny enthend que aulcung inventaire de ses biens meubles denrées ny cabaulx soict faict dauthoritté de justice mais bien par ung nõre royal, sy a prié les tesmoings soubz escripts par luy duement recoigneus estre records et memoratifs du contenu en sond testement pour luy en faire et porter tesmogniaige de veritté et a moy nõre luy en faire et rettenir acte.
Faict et recitté dans la maiõn dud testateur pñs a ce Mre Anthoine SOUQUET viccaire dud lieu de Fozieres, Pierre JORDAN baille dud lieu, Hugues JEAN, Estienne JEAN, Jean JEAN, Clement JEAN dud mazaige du Terondel et Mr Pierre MANEVY jeune marchant dud Lodeve et moy Guillaume BRUN nõre de lad ville soubzné avec lesd Mre SOUQUET et MANEVY led testateur et autres tesmoings ont dict ne scavoir escripre.
P. MANEVY pñt, Anthoine SOUQUET pñt, BRUN nõre