AD 12, 3E 19 450, M° CAREL notaire de St Félix de Sorgues
Testament le 5 avril 1653 à la Rocaubel de
Antoinette SALVANHE, 1449 G 11, femme de Jean ARLABOSSE
L'an mil six cents cinquante trois et le cinquiesme jour du mois dabvril appres midy regnant tres chrestien prince Louys par la grace de Dieu roy de France et de Navarre au lieu de La Roquaubel lès Nonenque pardevant moy notaire soubzné et pñts les tesmoings bas anoumés a esté pñte en sa perssonne constituée Anthonette SALVANHE femme de Jean ARLABOSSE dud La Roque laquelle gizant malade dans son lict au pres du feu detteneu de certaine maladie corporelle de laquelle elle doubte mourir toutes fois saine de son sens et entendement et sachant que tout bon chrestien doibt deceder une fois de ce monde en lautre, a voleu dispozer de son ame corps et biens en la forme et maniere que dessoubs
Premierement a recomandé son ame a Dieu le pere tout puissant, a la benoiste Vierge Marie, a touts les Sts et Stes de paradis [Renvoi en marge: en faizant le signe de la Ste croix en dizant in nomine patris et filii et spiritus sancti, Amen] les priant vouloir interceder envers Dieu põr son ame le priant que quant elle sera separée de son corps que sond corps soict enterré inhumé au cimitière de St Amans de Valsorgue
Eglise de St Amans de Valsorgue
tombeau de ses predecesseurs trespassés, ITEM veult et ordonne que sa nouvene et chef d'an (neuvaine et bout d'an) soict faicte fere par son heritier bas anoumé a sa discreption ITEM veult ordonne que par sond heritier soict donné, distribué aux pauvres de nostre seigneur Jesus Christ la quantitté de deux cestiers bled et mixture distribué devant la porte de son abithation dans lan appres son deceds, ITEM a donné a George et Jean ARLABOSSE ses fils legitimes paternels, a ung chacun diceulx la somme de trente livres ts payables lhors quils seront en eatge (âge) de se marier ou dapprendre un mestier, et avec ce les a faicts ses heritiers particuliers, (voulant) que autre choze ne puissent demander ny quereller en sesd biens leur impozant silence perpetuel, de plus aud Jean donne une petitte caysse fermée a clef, ITEM donne et legue a Margueritte ARLABOSSE sa filhe la somme de soixante livres ts et ensemble une caysse fermée a clef attendu son indisposition, payable le jõr de son mariatge au cas où ne se mariait pas lhors quellle sera en eatge põr sen pouvoir servir au bezoing, et avec ce la faicte son heritiere particuliere, ITEM a donné et legué aux enfants de feue Marie ARLABOSSE sa filhe la somme de doutze livres ts payable lorsquils seront en eatge et avec ce les a faicts ses heritiers particuliers, et finalement a donné a Françoize ARLABOSSE sa filhe femme de Jean TRELHET de Valhauzi pareilhe somme de doutze livres payables dans lan appres son deces et avec ce la faicte son heritiere particuliere (voulant) que autre choze ne puisse demander ny quereler en sesd biens luy impozant silence perpetuel.
Et en touts et chacuns ses autres biens pñts et advenir a faict son heritier universsel et legal Jean ARLABOSSE son mary bien aymé a la charge de rendre lad hereditté aud George son fils a la fin de ses jõrs ou plustost sy bon luy semble, cassant et revoquant touts autres precedants testements sy poinct en y a, voulant que ce soict son dernier et valable testement et en cas ne pourroit valoir par testement veult que valhe par codicille ou donnaõn faicte a cauze de mort entre vifs a jamais irrevocable aussy a prié les tesmoings par luy (elle !) bien recogneue lung appres lautre estre memoratifs de son pñt testement põr en apporter tesmoinilhage de veritté au bezoing et a moy notaire soubzné en rettenir instrument que luy ay concedé
Faict et recitté où que dessus en presence de Jean DURAND de La Tour et Pierre CAREL praticien de St Felix soubznés Anthoine ARLABOSSE marchant Charles PUECH dud La Roque George ARLABOSSE marchant rentier del Mas Andralh, Guilhaume et Jean ROUBINS frères, Sr Gabriel FLOTTARD et Pierre BALDY abitants dud La Roque quy avec lad testatrice requis signer ont dict ne savoir, et moy Jehan CAREL notaire requis soubzné.
DURAND, CAREL, Jehan CAREL notaire royal