AD 34, 2E 39/506 M° Guillaume BRUN Notaire de Lodève
Le 5 septembre 1647 Testament de Catherine ALMERAS 3019 G 12
Testement de Catherine ALMERASSE vefve de Mr Estienne VERNETTE des Plans
Au nom de nre seigneur soict faict amen l'an mil six cens quarante sept et le cinquiesme jour du moys de septembre avant midy regnant le prince que dessus dans le lieu des Plans dioceze de Lodeve pardevant moy notaire royal soubzné pñs les tesmoings soubz escripts a esté personnellement establye honneste femme Catherine ALMERASSE vefve de Mr Estienne VERNETTE quand vivoit marchant habitant dud lieu laquelle estant mallade dans son lyt dettenue de certaine maladie corporelle dont en doubte mourir quoy nonobstent saine de ses sens memoire et entendement par la grace de dieu, considerent la vye de ce monde quy est miserable et quil ny a choze plus certaine que la mort ny plus incertaine que lheure dicelle desirant pourvoir au salut de son ame dispozer et ordonner des biens que (dieu) luy a donnés en ce monde a ce que apres son deces narrive proces entre ceux qui doibvent succeder en iceulx a ceste cause de son bon gred tout dol et fraulde cessant, a faict et ordonné son dernier testement nouncupatif et derniere disposiõn de ses biens comme sensuyt.
En premier lieu en signe de bonne chrestienne et catholicque a faict le signe de saincte croix sur sa personne disant in nomine patris et filii et spiritus sancti amen, ayant recomandé son ame a la saincte trinitté les priant de luy fere pardon et misericorde des offences quelle a comis en ce monde et comettra jusques a lheure de son trepas implorant a ses fins les suffraiges de la glorieuse vierge Marie et de touts les saincts et sainctes de paradis et a voulu et ordonné que lors quil aura pleu a dieu lappeller a soy et que son ame sera sepparée de son corps quicelluy soict enterré au venerable cimitiere de lesglize parrochelle dud lieu et thombeau de son feu mary et que a la sepulture soient appelés sept pbres a la neufvene et bout dan neuf chasque foys a ce quils prient dieu pour son ame (et celle) de son feu mary et autres pour lesquelles elle (est) teneue de prier que sa neufvene soict suivie faizant dire chasque jour messe basse de requiem avec offrende de pain vin et lh... (?) ainsy quest accostumé sy a voulu et ordonné que apres son deces et durant lannée dicelluy soict cellebrée une messe de requiem chacune sepmaine au jour quelle decedera faizant priaires pour son ame et autres pour lesquelles elle est tenue de prier et a voulu aussy que a la prochaine feste de la Noël an lan elle sera decedée soict donné une aumosne s... caritat de troys cestiers bled misture en pain chacun a touts les pauvres parrochiens dud lieu.
ITEM a legué et donné lad testatrice pour droict dinstituõn heredictaire portion et pour tous droicts et actions que Isabeaux VERNETTE sa filhe legitime et naturelle femme de Pierre COURTES couroyeur dud Lodeve pourroict avoir ou prethendre tant sur ses biens que sur ceulx quont appartenu aud feu VERNETTE son mary que droict de succession des enfans decedes (1) scavoir est une piece de terre champ appelée le champ Delmas assis au terroir dud lieu confrontant avec le Vallat de la Foux, le chemin allant dud lieu a Lodeve, Mr Estienne VERNETTE son beau frere et Jaques HUGONENQ pour en fere et dispozer a ses plaizirs et volontés et oultre ce la somme de mil livres ts quest cent cinquante livres deus par Geraud BOYER marchand dud Lodeve, cent cinquante livres par la vefve de Pierre GRAZEDON dud Lodeve et par la vefve de Raymond ORSSAUD de Poujols trente livres ou envyron desquels elle se fera payer, et la somme de sept cens livres pour fere lentiere somme de mil livres veult que luy soict payé lors et quand son heretiere bas nommée se mariera et non plus thost, et oultre et par dessus la dot que luy feust constituée ny cession de debte de Jean SALGON quelle luy a faicte et moyenent ce veult que soict comptente de touts lesd droicts et sucession sans pouvoir prethendre autre choze la faizant son heretiere particulliere
[Renvoi: ITEM a legué et donné a Catherine DURANTE et Jean COURTES ses filheuls enfans de lad VERNETTE sad filhe (2) une brebys de port a chacun payable apres son deces et moyenent ce les a faicts ses heretiers particulliers et veult que quittent son heretiere universelle et generalle soubz escripte] a tous et chacuns ses parens qui prethendront droict en sesd biens a legué et donné cinq sols ts payables apres sond deces et moyenent iceulx les a faicts ses heretiers particulliers et (veult) que quittent son heretiere universelle soubz escripte.
Et en touts et chacuns ses autres biens noms droicts voix et actions meubles immeubles pñs et advenir et dud VERNETTE où que soient et puissent estre assis et scittués son heretiere universelle et generalle a faicte instituée lad ALMERASSE testatrice et la nommée de sa propre bouche scavoir est Françoise VERNETTE aussy sa filhe legitime et naturelle et dud feu VERNETTE pour en fere et dispozer a tous ses plaisirs et vollontés tant en la mort qua la vye par laquelle veult que soict satisfaict aux leguats que dessus et autres debtes que apparestront estre legitimement deubs cassant et revocquant tous autres testemens codicilles donnaõns ou autre derniere disposiõn a cauze de mort faicts le sien pñt testement demeurent vallable en la meilheure forme que testement peult valloir de droict [Renvoi: et attendu que son heretiere est encore moindre de vingt cinq ans nayant atteint que dix huict ans elle a nommé pour curateur dicelle pour lacister de conseil et advis dans ses affaires led VERNETTE son beau frere et veult et entend quicelle ne puisse rien fere sans lacistance et conseil dicelluy ] ayant prié les tesmoings soubz escripts par elle duement recoigneus et nommés estre memoratifs du conteneu en sond pñt testement pour luy en fere et porter tesmogniaige de veritté et a moy notaire luy en fere et rettenir acte et instrument et icelluy expedier a sesd heretiers et autres quil appartiendra ce que luy ay concedé.
Faict et recitté dans la maiõn de lad testatrice pñs a ce Mr Jean BOURGUY pbre et vivaire dud lieu Guillaume ARNAIL, Guillaume GELY desd Plans, Pierre MARCORELLE cardeur de layne de Solaiges, Estienne VERNETTE jeune aussy desd Plans, Jean AUJAT (?) et Pierre PERUSSE aussy cardeurs de layne dud Lodeve et moy Guillaume BRUN notaire royal de lad ville soubzné avec lesd tesmoings sauf lesd PERUSSE et AUJAT qui ont dict ne scavoir escripre ny lad testatrice.
J. BOURGUY, ARNAILH, E. VERNETTE, GELY, MARCOURELLE, BRUN nõre
Notes: (1) en 1647, il ne reste plus que deux enfants (Izabeau et Françoise) sur les 8 du couple VERNETTE-ALMERAS. (2) Izabeau est veuve en premières noces (1630) de Jacques DURAND et épouse (1639) de Pierre COURTES;