AD 42 5E_VT1029DEN_5242 M° PAUCHE St Héand (42)
24 septembre 1637 Testament de Julien DUTRUEIL 7492 G13
Au nom de la saincte et individue trinité du pere, du fils et du sainct esprit, ainsi soit il, a tous ceulx qui ces pñtes lettres verront, nous Emmanuel de Lascaris d'Urfé baillif de forest, scavoir faisons, que pardevant le nõre royal aud baillage soubsné et en pñce des tesmoins bas nommés, fut pñt en sa personne honneste Jullien DUTRUEIL marchand voiturier du lieu des Sauniers paroisse St Heand, lequel de son bon gré, estant malade du corps, bien disposé de ses sans parolle memoire et entendement et ayant loffice de la langue libre, reposant dans le lict, considerant ce mortel monde, et quil ny a rien de plus assuré que la mort, et de lheure incertaine, desirant prevenir non estre prevenu, appres avoir revocqué tous testamens, a part lesd pñts, faict son testament nuncupatif en la forme et maniere qu'ensuit
Et premierement a faict sur lui le signe de la croix disant in nomine patris et filiis et spiritus sancti amen, a recommandé son ame a dieu a ce quil lui plaise davoir pitié de ses faultes, veult que lame estant seprarée de son corps estre enterré honnorablement ? dans le cimetiere de leglise de St Heand et dans icelle estre faict prieres a ses ..tutions
Item donne et legue par droict d'institution a Jan,
Anthoine, Louys et autre Anthoine DUTRUEIL ses
enfans legitimes et de Florie LAURENT sa femme et
a chacun deulx la somme de trois cens livres ts
pour tous les droicts quils peulvent avoir en ses biens
a les leur payer quand ils auront attaint lage
parfaict de vingt cinq ans,
Item donne
et legue aussi par (...) droict que dessus a
Philiberte, Louyse, Alix, Suzanne et Jane DUTRUEIL
aussi ses filles naturelles et legitimes et
de lad LAURENT, a chacune delles cinq cent livres ts
a les leur payer lors quelles seront collocquées en mariage
a con(ventions?) qui seront arbitrées et arrestées par leurs
parens et ce pour tous les droicts quelles peulvent avoir
en ses biens,
Item donne aussi a Anne
DUTRUEIL sa fille mariée avec Anthoine VOSTA le somme
de cinq livres ts a les lui payer a la fin de lan
revollu (...) qui teste [Renvoi:pour les droicts quelle pourroit pretendre en ses biens, sans desroger a la quittance generalle qu'elle lui a passée par son contrat de mariage de ses droicts de legitime ]
Item donne et legue aussi
a tous ses parens pretendant droicts en sesd biens, a chacun deulx
la somme de cinq sols ts, a les leur payer ayant faict
apparoir de leursd droicts
(Et) au residu de tous et chacuns ses autres biens ny donnés ny legués donnera ny leguera led testateur a faict dicté cest et de sa propre bouche nommé põr son heritiere fideicommise en tous sesd biens, lad Florye LAURENT sad femme, põr en jouir sa vie durant ou autrement ainsi qu'elle verra bon fere a la charge de randre son hoirie a certain de ses enfans masles, tel ou tels quelle verra bon estre, lui donnant le regime, administration et plaine jouissance de tous sesd biens sans quelle soit tenue den rendre compte a nul quelconque ny presenter aulcuns relicquat, que où il y seroit, luy en faict don et leguat , et daultant que sad femme pourroit decedder sans fere lad nominaõn d'heritier en sad hoirie, auquel cas et non autrement, nomme põr heritier universel en sesd biens led Jan DUTRUEIL sond fils, a la charge de payer tous ses debtes, frais funeraires et legats sans forme ny figure de proces, vente et ordonnance que tous les meubles a luy appartenant soyent acquis a sad femme, luy en faisant aussi leguat, sans que de mesme elle soit tenue d'en rendre compte ny presenter relicquat a nul quelconque que où il y auroit relicquat le luy donne et legue sans quelle soit tenue den fere aulcun in(ventaire) que si elle desire quil soit faict, veult quil le soit, par le pñt nõre royal requis, et põr extimer lesd meubles, a nommé les sr Claude F..EL marchand de St Heand et Pascal DUTRUEIL son frere, et en leur absence, les pra(ticiens) qui seront par sad femme appelés le jour põr servir ce que de raison a la volonté de sad femme, luy laissant comme dict est volonté libre, deffendant aux srs officiers de Fontaneys et autres de ne procedder a aulcung fouille dans sa maison, ni procedder a aulcung inventaire, attendu les legats par luy cy dessus faicts, car ainsi a esté vollu, dicté et ordonné par led testateur, auquel a esté leu et releu le pñt testament quil a dict estre sa volonté quil desire et veult estre (...) a autre, voullant quelle vaille par forme de testament nuncupatif solempnel, codicille, donation a cause de mort et par touttes voyes quil pourra et debvra valloir priant et requerant les tesmoins bas nommés estre souvenants de sa volonté presente et de porter tesmoignage de vérité en tous lieux et led nõre d'en faire expedition a quil appartiendra, et daultant que tous sesd enfans sont mineurs de (moins de) vingt cinq ans, donne la tutelle et curatelle d'iceulx a lad LAURENT sad femme, en tesmoignage de quoy nous baillif susd avons ordonné le scel royal estre apposé aux pñtes dans le moys(,) suivant lédit de sa Majesté,
(Pñtes) qui furent faictes et passées dans la maison dud testateur et chambre hautte aud lieu des Sauniers avant midy le vingt quatrieme jõr de septembre mil six cens trente sept en pñce de Claude MEILLIER laboureur Mathieu JACQUIER faure, Jan ANTHONO charpentier, Jan FAURE tisserand, Claude COZON aussi tisserand, Guillaume MORETON et Jan MEILLIER laboureurs tous residant dans lad paroisse St Heand tesmoins requis, a signé led testateur, avec lesd Mathieu JACQUIER et Jan MEILLIER non les autres tesmoins põr ne scavoir ainsi quils ont dict, sommés et interpellés de ce faire.
nous approuvons les deux lignes et deux mots rayés.
J DUTRUEL, JACQUIER, MELLER, PAUCHE Nõre royal
Aujourd'hui vingt cinquieme septembre mil six cens trente sept par (devant) moy nottaire royal le testament faict par Jullien DUTRUEIL marchand du lieu des Sauniers parroisse St Heand et mandement de Fontaneys [Renvoi: daté du jour d'hier receu par led soubsné] a esté signiffié a Me Jehan CHOREL procureur doffice dud Fontaneys tant pour lui que les aultres sieurs officiers dud Fontaneys, a ce quils nen pretendent cause dignorance, partant a sa personne, lequel a demandé coppie que lui a esté laissée, faict a Chevrieres avant midi an susd en pñce de Mathieu JACQUIER faure, et Jan ANTHONO charpentier de la parroisse St Heand, tesmoings requis, led JACQUIER a signé, non led ANTHONO põr ne scavoir, et quant aud Sieur CHOREL, il a faict reffus de signer.
JACQUIER, PAUCHE Nõre royal
Au dos de l'acte:
Jullien DUTRUEIL est decedé le 25° 7bre environ les 2 heures appres minuit led jour 1637.
Et sur les .. heures dud jour la Philiberte sa fille a testé parlant son pere estoit decedé avant quelle teste, ce dict põr scavoir la verité.