AD 34, 2E 39/528 M° Guillaume BRUN Notaire de Lodève
Le 30 août 1669 Testament de Marie GUIRAUDOUNE
veuve de Dominique RIFFY 5552 G 13 fourbisseur de Lodève
Au nom de nostre seigneur dieu soict faict amen lan mil six cens soixante neuf et le trentiesme jour du moys daoust appres midy regnant le prince que dessus dans Lodeve pardevant moy nõre royal soubzné pñs les tesmoings soubz escripts a esté personnellement establye Marie GUIRAUDOUNE vefve de feu Dominique RUFFI forbesseur quand vivoict de Lodeve laquelle estant indispozée de sa personne de certaine maladie corporelle et en doubte mourir quoy nonobstant estant en ses bons sens memoire et parfaicte cognoissance par la grace de dieu considerant la vye de ce monde qui est mizerable et quil ny a choze plus certaine que la mort ny plus incertaine que lheure dicelle dezirant pourvoir au salut de son ame dispozer et ordonner des biens que dieu luy a donnés en ce monde affin que appres son deces narrive proces ny disferant entre ceux qui doibvent succeder en iceux a ceste cause a faict et ordonné son dernier testement nouncupatif et derniere dispoziõn de ses biens comme sensuyt.
En premier lieu en signe de bonne chrestienne et catholicque a faict le signe de la sainte croix sur sa personne dizant in nomine patris et filii et spirittu santi amen et a recommandé son ame a la tres sainte trinitté la priant luy faire pardon et mizericorde des offences quelle a commis en ce monde et comettra jusques a lheure de son trepas implorant a ses fins les suffraiges de la glorieuse vierge Marie sa patronne et de tous les saints et saintes de paradis et a voulleu et ordonné que lhors quil plaira (a dieu) de lappeller a soy et que son ame sera separée de son corps quil soit enterré dans lesglize du Couvent des Reverands Peres Carmes de lad ville au thombeau de ses predecesseurs remettant lhonneur de ses funerailhes et obseques a la disposition de ses heritiers universels soubz escripts.
Et a legué et donné lad testatrice a Jacques RUFFI son fils pour tous droicts et actions quil pourroict prethendre en ses biens la somme de dix sols ts payable dans lan appres son deces oultre et pardessus ce quelle luy a sy devant donné et baillé et moyenant ce veult que soict comptant de tous autres biens et la faict son heretier particulier. Plus a legué et donné a Jean AUDIBERT aussy son fils legitime et naturel et de feu Jean AUDIBERT son premier mary le droict et legitime quil pourra competer sur ses biens moyenant ce veut que soict comptant et la faict aussy son heretier particulier. Davantage a legué et donné a tous ses autres parens consenguains et linagiers quy prethendront droict en sesd biens cinq sols entre eux a divizer payables appres son deces et moyenant ce veut que soient comptants et ne puissent prethendre autre choze en sesd biens.
Et en tous et chacuns ses autres (biens) noms droicts voix et actions meubles immeubles presans et advenir où que soient et puissent estre assis et scittués a lad testatrice appartenans ses heretiers universels et generaux a faicts et institués lad GUIRAUDOUNE testatrice et les a nommés de sa propre bouche scavoir est Jean MAS son beau fils Me pareur de draps et Catherine RUFFINE sa filhe legitime et naturelle et dud RUFFI son mary pour en faire et dispozer a leurs plaizirs et vollontés et que lhereditté vienne de lung a lautre au dernier vivant par lesquels veut que soict satisfaict au contenu de son presant testemant et autres debtes qui apparestront estre legitimement deubs cassant et revocquant tous autres testemans codicilles donnaõns ou autre derniere disposition a cauze de mort faicts le dernier demeurant vallable en la meilheure forme que testement peut valloir de droict et a prié les tesmoings soubz escripts par elle duement recogneus et nommés estre memoratifs du contenu en icelluy pour luy en porter tesmogniage de veritté et a moy nõre en faire et retenir acte ce que luy ay concedé.
Faict et recitté dans la maison de lad testatrice presans a ce Jacques BRUN praticien, Jean François MARTIN Mre escripvain, Barthelemy LUGANHE Marchant, Fulcrand DURAND Me serrurier, Jean MARTIN Me menuzier, Jean HUGONENQ Me tailheur, Jean PEYROTTES fils dautre blanchier hañs dud Lodeve soubznés lad testatrice a dict ne scavoir escripre et moy Guillaume BRUN nõre royal de lad ville soubzné.
Jean PEYROTTES, MARTIN, DURAND, Jean HUGOUNENC, LUGANIE, Jean MARTIN, BRUN, BRUN nõre