AD 12 3E 7642 (F°74), M° François MIQUALET Séverac le Château (12)

Le 4 mai 1629, au Massegros (48) paroisse d'Inos, testament de

Etienne BOURREL 6094 G 13

Testemant d'Estienne BORREL paysant du village del Massegro

Au nom de nostre seigneur Jesus Xpt (Christ) soit fait amen   Scaichent touts pñts et advenir que l'an de grace mil six cens vingt neuf et le quatriesme jour du moys de may apres midy au village del Massegro maiõn d'Estienne BORREL   regnant nõre souverain prince Louys par la grace de Dieu roy de France et de Navarre   devant moy notaire et tesmoings bas nommés

A esté presant en sa personne led BORREL   lequel quoy que indisposé de son corps sain toutes foys de ses sens memoyre et antandement   considerant ny avoir choze plus certaine que la mort ny plus incertaine que lheure dicelle crenhant (craignant) den estre surpris   a ceste consideraõn et pour guarder que apres sa mort entre sa femme enfans et autres ses parans et amys ny aye point de proces ny differant   a voulleu pourvoir   premierement pour le salut de son ame et apres dispozer des biens quil a pleu a Dieu luy donner en ce monde   faisant et ordonnant son testement de derniere voullanté en la forme et maniere que sensuit

En premier lieu cest signé et muny du signe de la Croix dizant In nomine patris et filii esperitus santy amen   et apres a recommandé son ame a Dieu tout puissant le pryant que lhors quelle sera despartie et separée du corps la voulloir recepvoir en son paradis   a la glorieuse Vierge Marye et a touts les saints et saintes de paradis les pryant destre ses advocats et intercesseurs   voullant de plus led testateur lad separaõn faite sond corps estre aspourté a ecclesiastique sepulture dans le saint et sacré cemetiere de lesglize parroissialle du lieu d' Ynos et dans le tombeau de ses deux predecesseurs   Dans laquelle esglize a voulleu que ses honneurs funebres luy soient faits par son heretier bas nommé   et que les jours de son sepulture bout de nouvene et chef d'an soyent convoqués et appellés ung chacun desd jours dix pbres (prêtres) comprins le sieur recteur de lad parroysse   voulant estre donné a ung chacun cinq souls et la reffection corporelle et a celuy que celebrera la sainte messe six souls   et au clerc pour demy pretre (trois souls)   de mesme veult que sa nouvene luy soit faite suivant la coustume de lad parroysse   et quen chacun jour durant icelle soyent de mesme appellés troys pbres   a chacun desquels veult estre donné ung chacun desd jours troys souls   et a celuy que dira la messe quatre souls   tant seullement et que durant icelle (nouvene) soit faite offrance de pain vin et lumiere ensamble touts les dimanches de l'an apres son trespas   Comme aussy veult et antand led testateur que le demy an apres son trespas passé luy soit fait ung canta... (messe chantée ?) dans lad esglize d'Ynos et y estre appellé cinq pbres   a ung chacun desquels veult estre donné cinq souls et la reffection corporelle   et a celuy que dira la messe six souls   Plus donne et legue led testateur au recteur dud Ynos qui est a pñt ou sera le jour de son deces   une carte froment payée par une foys seullement   moyenant laquelle sera tenu de recommander son ame au prosne de lad esglize touts les dimanches de lan apres son trespas   Et au plat (bassin) des ames du purgatoire fayzant queste (quête) en lad lesglize   a donné un brebis payé par une foye seullement   une chausse une chemise et une chemizolle que veult estre payé incontinant apres son deces   Item a donné a honneur de Dieu et en remission de ses pechés dix cannes drap bureau que veult estre distribués a dix pauvres tels que seront choysis par son heretier bas nommé a raison dune canne a chacun   moyenant laquelle seront tenus d'acister a ses sepulture sa nouvene et bout d'an pourtant (en portant) ung sierge allumé entre leurs mains et soient tenus prier Dieu pour son ame (et celles) de ses parans trespassés   Plus a donné comme dessus a honneur de Dieu et en remission de ses pechés une aulmosne suie (?) caritat de la quantité de cinq cestiers nou..? valhant segle que veult que sond heretier soit tenu donner aulx pouvres de lad parroysse et autres que la viendront prandre en pain cuit au devant la porte de lesglize dud Ynos par une foys seullement le jour et feste de Saint Estienne prochaine apres son trespas

Plus a donné et legué a Françoise VERDIER sa femme   pour les bons et agreables services quil a receus delle vescut ung chacun jour et espere de recepvoir a ladvenir   en cas de discord avec sond heretier et vivant toutes foys viduellement la pansion telle que sensuit   Premierement pour faire son habittaõn une maõn joignant sa grange composée de troys estaiges   confronte yere (hiere) de Jean BAUMEL et lad grange  laquelle sond heretier sera tenu icelle mettre en estat habittable et meubler de meubles requis et necessaires suivant sa qualitté   une robe de deux en deux ans   une chemize   ung pere de souliers   ung chapeau   ung couvre chef   une chausse manche (?) touts les ans   et pour son antrettenement dix cestiers bled   quatre cestiers froment   troys segle et troys orge beau bled marchant mesme melh(eur ?) prest a mouldre   soixante livres chair sallée de pourceau   quarante livres fromaige   le tout poix de romaine (balance)   une carte scel   vingt livres huille moytié olif et lautre noix   quatre livres pour avoir de vin   et annuellement quarante souls pôr en dispouzer a faire prier dieu ou autrement comme bon luy samblera   une carte poix (pois) et une carte lantilhes   permission de prandre du boix du buchier des herbes du jardrin de rabes (raves) de la rabiere pour son uzaige seullement   lad pansion payable (...) chacune année   scavoir le bled a Saint Michel et le demeurant a la feste Saint André   a telle charge que sad femme prenant la susd pansion ne pourra repetter la somme et autre choses quelle a asporté (sa dot) et requerir sur ses biens

Item a legué et donné par droit dinstituõn hereditaire part et portion a Jean   Anthoine   Guilhaume   Estienne   Pierre   et Jacques BOURELS ses enfans legitimes et naturels et de lad VERDIER sad femme et a ung chacun deulz   la somme de cinq cens livres tz une couverte et deux linceuls   payable la moytié de lad somme avec la couverte et deux linceuls le jour de leur mariaige   et lautre moytié restante a esgaulx payements de vingt livres   le premier desquels se commensera ung an apres leurd mariaige et ainsin continuant jusques a ce que lad somme sera antierement payée   Plus veult et antand led testateur que sond heretier bas nommé soit tenu de tenir aux (...) lesd Estienne Pierre et Jacques BOURRELS pandant quatre ans et ce au dessus de leur dit leguat

Item a legué et donné led testateur par samblable droit que dessus a Jeanne et Françoise BORRELLE ses filhes legitimes et naturelles et de lad VERDIER sad femme et a une chacune dicelle la somme de huit cens livres   troys robes sarge de Nismes lune dicelles cousset (?) noir et les autres deux de la colleur que bon samblera a sesd filhes   faites folrés (fourrées ?) et guarnyes   deux couvertes (toile) de maizon et quatre linceuls   quinze brebis de port et cinq captalles (voir vacine) bon et sain bestial   ce dessus payable a une chacune de sesd filhes scavoir le jour de leur mariaige la somme de quatre cens livres avec lesd robes couverte linceuls et brebis   et les quatre cens livres restants se payeront a esgaulx et divers payements de vingt livres   le premier desquels se commansera ung an apres leur mariaige et ainsi continuant jusques a tant que lad somme sera antierement payée

Plus a legué a Anthoine BORREL du village de La Guiraldye * son frere la somme de cinq souls payée par une foys apres son deces   Item a legué a Margueritte   Catherine   Guilhaumette   et Jeanne BORRELLE ses seurs et a une chacune delles la somme de cinq souls payée par une foys apres son deces   Et a touts ses nepveus niepces et autres prethandans droit en ses biens la somme de cinq souls a sen partir esgallement entre touts payée par une foys   Sy a aussy donné led testateur a Marie BOURELLE sa filhe naturelle femme de Pierre LAFON (?) dud village la somme de cinq souls payée par une foys apres son deces   Et moienant les susd leguats par led testateur faits a sesd leguataires   les a faits et institués ses heretiers particuliers de ses biens   leur impausant sillence perpetuelle

Et en touts et chacun ses autres biens noms voix droits et actions quelsconques pñt et advenir out (où) que soyent assis ny out que non   a fait et institué son heretier universel et general et de sa propre bouche sommé   scavoir est François BORREL son fils legitime et naturel er de lad VERDIERE sad femme   a la charge soit tenu de payer et acquitter touts les susd leguats et autres debtes que par luy se treuveront estre legitimement deubs   Executeur de sond testement a fait le sieur recteur dud Ynos qui est a presant ou sera le jour de son deces   Et ce dessus a dit estre son dernier testement que veult que valhe en ceste forme donnaõn a cause de mort ou codicille et autrement en la melheure forme que pourra devoir valloir   Cassant et revoquant tous autres testements donnaõns ou codicilles quil pourroit avoir sy devant faits le presant demeurant en ses force vertu et efficasse   Priant les tesmoings que sont icy bas nommés estre memoratifs de sa voullanté põr tesmoigner de sa voullanté quand ils en seront requis   et moy notaire en rettenir acte et instrument que luy ai concedé

Fait et recitté où que dessus   presans Me Bernard de PARIS pbre et recteur dud Ynos   Me François VERDIER pbre del Ginou   Jean MAZEL paysan du village de Romainhac   Jean PRADEL praen de Seubac (?) soubznés   Miquel JAUDOU   Pierre CALMET tisseran   Pierre SALEL marchant et Simon SALEL touts dud village del Massegros   quy ny led testateur ont dit ne scavoir escripre ny signer   et de moy François MIQUALET notaire royal hereditaire dud Severac soubzné qui (...)

DE PARIS recteur,   VERDIER,   MAZEL,   PRADEL,   MIQUALET, notaire

Note: La Guiraldie, à St Saturnin de Lenne, Aveyron