AD 34, 2E 39/514 M° Guillaume BRUN Notaire de Lodève
Le 1° décembre 1655 Testament de Marguerite MARTINE 3009 G 12
veuve de Pierre BRUNEL des Plans 3008 G 12
Au nom de notre seigneur dieu soict faict amen lan mil six cens cinquante cinq et le premier jour du moys de decembre apres midy regnant le prince que dessus au lieu des Plans dioceze de Lodeve pardevant moy notaire royal soubzné pñs les tesmoings soubz escripts a esté personnellement establye Margueritte MARTINE vefve de feu Pierre BRUNEL laboreur habitant dud lieu, laquelle estant mallade dans son lyt de certaine malladie corporelle dont elle doubte mourir quoy nonobstant saine de ses sens memoire et entendement par la grace de dieu considerant la vye de ce monde quy est mizerable et quil ny a choze plus certaine que la mort ny plus incertaine que lheure dicelle dezirant pourvoir au sallut de son ame dispozer et ordonner des biens que dieu luy a donnés en ce monde a ce que apres son deces narrive proces ny disferent entre ses heretiers et successeurs a ceste cause de son bon gred tout dol et fraulde cessant a faict et ordonné son dernier testement nouncupatif et derniere disposiõn de ses biens comme sensuyt.
En premier lieu en signe de bonne chrestienne et catholicque a faict le signe de la saincte croix disant in nomine patris et filii et spirictu sancti amen ayant recomandé son ame a la saincte trinitté la priant de luy faire pardon et mizericorde des offences quelle a comis en ce monde et comettra jusques a lheure de son trespas [Renvoi: implorant les suffraiges de la glorieuse vierge Marie et de tous les saincts et sainctes de paradis] et a voulu et ordonné que lhors quil plaira a dieu lappeller a soy et que son ame sera sepparée de son corps quicelluy soict enterré au venerable cimitiere de lesglize parrochielle dud lieu et thombeau de son feu mary remettant lhonneur de ses funerailhes a la dispoziõn des heretiers universels soubz escripts et que dans lannée dapres son deces soict faicte une aumosne sui caritat (?) donner en pain chuict (cuit) a touts les parrochiens de lad esglize de dix cestiers bled mixture.
Et a legué et donné par droict dinstituõn hereditaire portion et pour tous droicts et actions que Louys BRUNEL son fils pourroit avoir et prethendre en ses biens la somme de cent vingt livres ts payable en six années apres sond deces et en six payes esgalles quy seront de vingt livres chacune et comensera la premiere paye dans un an apres sond deces et moyenant ce la faict son heretier particulier et veult que soict comptant de ses autres biens. A touts ses nepveus et niepces et autres quy prethendront droict en sesd biens a legué et donné cinq sols ts payables apres son deces entre eulx a divizer et moyenant ce veult que soient comptents.
Et en tous et chacuns ses autres biens noms droicts voix et actions meubles immeubles pñs et advenir où que soict et puissent estre assys et scittués a lad testatrice appartenants ses heretiers universels et generaux a faicts institués lad MARTIN testatrix et nommés de sa propre bouche scavoir est Estienne et Jean BRUNELS aussy ses enfans esgallement tant a lung qua lautre pour en faire et dispozer a leurs vollontés tant a la vye qua la mort par lesquels veult que soict satisfaict au contenu en son pñt testement et autres debtes quy apparoistront estre legitimement deubs cassant et revocquant touts autres testements codicilles donnaõns ou autres dernieres disposiõns a cauze de mort son pñt testement demeurant vallable en la meilheure forme que testement peult valloir de droict ayant prié les tesmoings soubz escripts par elle duement recoigneus et nommés estre memoratifs du contenu en sond testement pour luy en porter testmogniaige de veritté et a moy nõre luy en faire et retenir acte et instrument et icelluy expedier a sesd heretiers et autres quil appartiendra ce que luy ay concedé.
Faict et recitté dans la maiõn de lad testatrix pñs a ce Mr Jean BOURGUIN pbre (prêtre) et viccaire Pierre GOUTTES sieur de Las Faisses, Guillaume ARNAIL, Jean GAUZIT fils a feu Philip, Guillaume AUBERT, Bernard TRIADOU et Anthoine BOSC touts habitans dud lieu et moy Guillaume BRUN notaire royal dud Lodeve soubzné avec lesd Sieurs viccaire Las Faisses, ARNAL et GAUZIT les autres ont dict ne scavoir escripre ny lad testatrix.
J BOURGUY, Las FAISSES DE GOUTTES, ARNAILH, GAUSIT, BRUN nõre