Archives Privées Famille CHEVRON Généagier.com
Le 29 avril 1667, M° TERRASSON, notaire de St Symphorien sur Coise (69):
Testament de Pierre CHEVRON de Pommeys (69) 1826 G 11 Au nom du pere du fils et du sainct Esprict amen, a tous pñs et advenir, scavoir faisons que pardevant le nõre royal soubzné et pñs les tesmoins bas nommés, personnellement estably honneste Pierre CHEVRON laboureur du lieu des Hormes paroisse de Pommeys, lequel estant sur son despart pour faire un long voyage, considerant en luy quil ny a rien de cy certain que la mort ny chose moins certaine que lheure dicelle creignant decedder de ce monde sans tester ny disposer des biens quil a pleu a Dieu luy donner en ce monde et pour obvier aux proces querelles et desbats qui pourroient naistre entre ses enfans et autres pretandans droicts en ses biens et hoirie sil decedoit ab intestat, a cette cause et autres plus justes consideraõns a ce le mouvant a faict son testement nuncupatif et ordonnance de derniere volonté a la forme et maniere que sensuit
Premier comme bon chrestien catholique apostholique romain a faict sur sa personne le vennerable signe de la ste croix disant in nomine patris et fillii et spiritus sancti amen a recommandé et recommande son ame a Dieu le createur a la glorieuse Vierge Marie a tous les saincts et sainctes de paradis les priant interceddant que par leurs prieres et intercessions son ame estant separée de son corps icelle (soict) collocquée au royaume des cieux au rang des biens heureux eslisant la sepulture de son corps en lesglise ou cimetiere de Pommeys sa parroisse au vas et tombeau de ses parens predeceddés pour le regard de ses frais funeraires, prieres aumosnes et obsecques sen remet et confie led testateur a la bonne volonté et discretion de son heritier apres nommé le priant dy faire son debvoir et de faire dire et celebrer le jour de son enterrement six grandes messes et six basses en lesglise dud Pommeys et de bailler et ausmosner aux pauvres led jour de son enterrement la quantitté de vingt bichets bled soigle mesure de Sainct Simphorien le Chastel avec du postaige (potage) a tous lesd pauvres, comme aussi sera tenu led heritier cy apres nommé faire dire et cellebrer en lesglise dud Pommeys autres six grandes messes et six basses a la fin de lan de dueil le tout pour le salut et repos de lame dud testateur,
lequel donne et legue pour une fois a Jeane CHEVRON sa fille et de Jeanne GAUTIER la somme de quatre cens livres ts quil veut luy estre payé par sond heritier apres nommé lors quelle aura atteint laage de vingt cinq ans ou quant elle viendra a colocquer en lordre de mariage a termes qui seront arbitrés entre parans et amis et ce sans proffict ny interests a la charge que sad fille et legataire susd sera nourrie et entretenue aux despans de son hoirie jusques elle sera en aage de pouvoir gaigner sa vie et ce pour tous les droicts actions et pretentions que sad fille et legataire susd pourroit avoir et pretendre en ses biens et hoirie la faisant et instituant en ce son heritiere particuliere
Donne et legue led testateur et par droict dinstituõn et legat particulier delaisse a tous les posthumes qui naistront a ladvenir a luy et a lad Jeanne GAUTIER sa femme sy cest fils a chacuns deux la somme de trois cens livres ts et sy sest filles a chacunes delles la somme de quatre cens livres qui leur seront payable par sond heritier cy apres nommé et lors quils se marieront a termes arbitrés entre parens et amis ou quant ils auront attaint laage de vingt cinq ans et ce sans aucuns profficts ny intherests jusques a ce et a la charge que tous lesd posthumes seront nourris et entretenus aux despens de son hoirie jusques a ce quils seront en aage de pouvoir gaigner leur vie en travaillant de leur pouvoir au beneffice de lheritier cy bas nommé et ce pour tous les droicts actions pretentions que lesd posthumes pourroient avoir et pretendre en ses biens et hoirie les faisant et instituant ses heritiers particuliers,
de mesme donne et legue led testateur par droict dinstitution et legat particullier delaisse a lad Jeane GAUTIER sa chere et bien aymée femme une pension viagere sa vie naturelle durant dune chambre dans sa maison appellé le fournie, tous les ans douze bichets bled soigle mesure St Simphorien le Chastel vingt livres lart sallé deux lampes huille de noix et la somme de quinze livres de (du) bois au (...) de raves en la raviere dherbage au jardin et des fruicts aux arbres fruictiers, laquelle pension sera payable a lad GAUTIER par sond heritier apres nommé a commencer lors du deced dud testateur et laquelle susd pension sera et deviendra estainte incontinant apres le deceds de lad GAUTIER et ce pour tous les droicts actions pretentions quicelle GAUTIER pourroit avoir et pretendre en ses biens et hoirie a lexception de ses conventions matrimonnialles la faisant et instituant en ce son heritiere particuliere,
finallement donne et legue led testateur et par droict dinstitution et legat particulier delaisse a tous ses autres parens et pretendans droicts en ses biens et hoirie a chacuns deux la somme de cinq sols que veut leur estre payé par sond heritier apres nommé lors quils feront apparoir de leurs droicts et ce pour tous les biens et droicts quils pourroient avoir et pretendre en ses biens et hoirie les faisant et instituans en ce ses heritiers particuliers
Au residu de tous les autres biens que led testateur na cy dessus donné et legué donnera ny leguera cy apres il a faict créé institué et de sa propre bouche nommé son heritier universel, assavoir Pierre CHEVRON son fils et (de) lad Jeanne GAUTIER auquel il veut et entend tous sesd biens advenir et appartenir de plein droict sans forme ny figure de proces, a la charge de payer et acquitter tous ses debtes susd legats et frais funeraires, et où led Pierre CHEVRON viendroit a decedder sans enfans et sans tester luy substitue led testateur laisné de ses posthumes pourvu quil soit fils et sy led posthume vient a decedder sans enfans ou (sans) disposer luy substitue lautre posthume a la charge aussi que soit fils
revocquant cassant et annullant led testateur tous autres testamens coddicilles donnations et autres disposiõns quil pourroit avoir cy devant faict soit par escript vierballement que autrement voullant et entendant que le pñt son testament soit sa seulle et derniere volonté et que valhe par forme de testament nuncupatif solempnellement faict et redigé par escript, donnaõn en cas de mort et par touttes les meilleures formes et moyens que testament peut et doit valloir, priant et requerant led testateur les tesmoins cy apres nommés et a luy bien connus tenir led testament secret jusques apres son deceds et lors en porter tesmoignage de verité et (priant et requerant) le nõre royal soubzné en faire une ou plusieurs expediõns a qui appartiendra,
faict et passé a St Simphorien le Chastel maison du notaire royal soubzné avant midi le vingtneufviesme avril mil six cens soixante sept pñs a ce honneste Claude TERRASSON (...) aud lieu Sieurs Joseph DAIGNASSE Aymé PLUMET celliers dud lieu, sieur Benoist TERRASSON marchand aud lieu Jean François COST tailleur dhabits aud lieu et Barthellemy MOLIERE courdonnier aud lieu tesmoins requis desquels lesd Sieurs TERRASSON Benoist TERRASSON et PLUMET ont signé la cedde et non led testateur et autres tesmoins pour ne scavoir de ce enquis et sommés suivant lordonnance.
TERRASSON notaire royal